სკოლებში X-XII კლასებისთვის საქართველოს ისტორია და ისტორია ცალ-ცალკე საგნად გაიწერა. ინფორმაციას ამაზე განათლების სამინისტრო ავრცელებს.

რატომ არის მნიშვნელოვანი: საქართველოს განათლების სისტემა და კონკრეტულად ისტორიის სწავლების მეთოდები არაერთხელ გამხდარა ექსპერტების კრიტიკის ობიექტი.

  • სფეროს სპეციალისტები ამბობენ, რომ ისტორიის სწავლების ის მეთოდი, რაც დანერგილია სკოლებში, მოსწავლეებს სიღრმისეულ განათლებას ვერ აძლევს.

დეტალები: სამინისტროში ამბობენ, რომ საქართველოს ისტორიის სწავლებისას აქცენტი ქართული ისტორიოგრაფიის აქტუალური პრობლემების კვლევასა და სიღრმისეულ გააზრებაზე გაკეთდება.

  • მათივე ცნობით, ისტორიის საგნის სწავლება მთავარ მიზნად მსოფლიო ისტორიული მოვლენების/პროცესების შესწავლასა და მათთან საქართველოს ისტორიის საკითხების დაკავშირებას ისახავს.

როდის დაინერგება ახალი მეთოდი: უწყების ცნობით, გრიფირების პროცესი უკვე დაწყებულია და წარმოდგენილია 5 გამომცემლობის სახელმძღვანელო საქართველოს ისტორიის საგანში.

  • რეცენზენტების ჯგუფის მიერ ამ სახელმძღვანელოების შეფასების პროცესი ივლისის ბოლომდე დასრულდება და 2022-2023 სასწავლო წლიდან X კლასის მოსწავლეებს საქართველოს ისტორიის ახალი სახელმძღვანელო ექნებათ.

კონტექსტი: გასულ წელს დღის წესრიგში დადგა მე-9 კლასის ისტორიის სახელმძღვანელოები, სადაც უახლესი ისტორიის საკითხები, მათ შორის ბიძინა ივანიშვილის ბიოგრაფია, ტენდენციურად, პოლიტიკურად მოტივირებულად იყო აღწერილი.

  • კრიტიკაზე სამინიტრომ თქვა, რომ წიგნებში ისტორიული პროცესები აღწერილია გამართულად, კომპეტენტურად და მრავალმხრივად, ისტორიის ახალი სახელმძღვანელოები კი სწორედ ამ სამინისტროს მიერ იქნება არჩეული.
  • ამას გარდა, პროცესზე პასუხისმგებელია იმ მინისტრის უწყება, რომელმაც ბიძინა ივანიშვილი ექვთიმე თაყაიშვილს შეადარა.