გაეროს ბავშვთა ფონდის მიერ ინიცირებული კამპანიის ფარგლებში 600-მდე სკოლის მოსწავლეს, მშობელსა და პედაგოგს ინკლუზიური განათლების შესახებ საინფორმაციო შეხვედრები ჩაუტარდა. შესაბამისი ინფორმაცია სოციალური ქსელების 280 000-ზე მეტმა მომხმარებელმა მიიღო. კაპანია მიმართული იყო სპეციალური საგანმანათლებლო საჭიროების მქონე ბავშვების მიმართ სტიგმის შემცირებისკენ. მისი მიზანია, ყველა ბავშვს, განურჩევლად მათი საჭიროებისა, შეუფერხებლად და თანასწორად მიუწვდებოდეს ხელი ფორმალურ და არაფორმალურ განათლებაზე. პროექტის მხარდამჭერს ნორვეგიის მთავრობა წარმოადგენს.

კამპანიის შემაჯამებელი ღონისძიება საქართველოში შეზღუდული შესაძლებლობების ადამიანთა დღეს, 14 ივნისს გაიმართა. ღონისძიებაზე კამპანიის მონაწილე მოსწავლეებს, მათ მშობლებსა და მასწავლებლებს ნორვეგიის სამეფოს საელჩოს მისიის ხელმძღვანელის მოადგილე, მარკო სოლდიჩი და გაეროს ბავშვთა ფონდის წარმომადგენელი საქართველოში, ღასან ხალილი შეხვდნენ.

კამპანია 2021 წლის ნოემბერში დაიწყო და მისი მთავარი მიზანი ინკლუზიური განათლების მნიშვნელობაზე ცნობიერების ამაღლება და საგაკვეთილო პროცესებში სპეციალური საგანმანათლებლო საჭიროების ბავშვების ჩართულობის გაზრდა იყო. შეხვედრები საქართველოს ექვს რეგიონში მიმდინარეობდა. რეგიონების სკოლების მოსწავლეები, მშობლები და პედაგოგები დეტალურად გაეცნენ დიფერენცირებული სწავლის მიდგომებს, რაც დასწავლის სხვადასხვა უნარის მქონე მოსწავლეს შესაძლებლობას აძლევს, თანაბრად ჩაერთონ სასწავლო პროცესში და საკუთარი თავი გამოავლინონ.

ტრენინგების პარალელურად აქტიურად მიმდინარეობდა დისკუსიები და იდეების გენერირების სესიები სასკოლო სივრცეებში, რაც მიზნად უკეთესი ინკლუზიური გარემოს შექმნას ისახავდა. შეხვედრების შედეგად, მონაწილეებმა გაიაზრეს ინკლუზიური განათლების პრინციპები, რაც გულისხმობს არა მხოლოდ ბავშვების ფიზიკურ დასწრებადობას, არამედ მათ აქტიურ და გაცნობიერებულ ჩართულობასაც. მონაწილეების თითოეულმა სოციალურმა ჯგუფმა დაინახა საკუთარი როლი ინკლუზიური გარემოს შექმნაში და კონკრეტული ხედვები გაუჩნდა.

გარდა პირისპირ შეხვედრებისა, საინფორმაციო კამპანია სოციალურ ქსელშიც აქტიურად მიმდინარეობდა. სოციალურ ქსელში 50-ზე მეტი საინფორმაციო მასალა განთავსდა, მათ შორის, საგანმანათლებლო-სახალისო რესურსები ინკლუზიური განათლების თემაზე. მასალების გავრცელების მიზანი იყო, მშობლებისა და პედაგოგებისთვის ეჩვენებინა პოზიტიური ქცევის მაგალითები, ასევე დახმარებოდა სოციალური ქსელის მომხმარებლებს სპეციალური საგანმანათლებლო საჭიროების მქონე პირების მიმართ სწორი ენისა და ეტიკეტის შემუშავებაში.

კამპანიას შემოუერთდა საქართველოში მოქმედი მაღალი სოციალური პასუხისმგებლობის მქონე კერძო სექტორის წარმომადგენლებიც, რომელთაც ინკლუზიური განათლების მხარდაჭერა საკუთარი საკომუნიკაციო სტრატეგიის ნაწილად აქციეს. პროექტის ფარგლებში ინკლუზიის თემაზე ცნობიერების ამაღლების აქტივობები სხვადასხვა კერძო კომპანიამ განახორციელა და ამით კიდევ ერთხელ ხაზი გაუსვა ბიზნესის ჩართულობის მნიშვნელობას განათლებისა და განვითარების საქმეში.

კამპანიის ფარგლებში ასევე ჩატარდა რაოდენობრივი კვლევა, რომლის მიზანი ინკლუზიის თემაზე საზოგადოების ინფორმირებულობის დონის შემოწმება იყო. კვლევის ერთ-ერთი ძირითადი მიგნება ისაა, რომ გამოკითხულთა 90% თვლის, რომ ინკლუზიური განათლების ყველაზე დიდი გამოწვევა პედაგოგების კვალიფიკაციის დონეა. კვლევის სრული ვერსია ივნისში გამოქვეყნდება.

კამპანია გაეროს ბავშვთა ფონდმა, ნორვეგიის მთავრობის ფინანსური ხელშეწყობით და განათლებისა და მეცნიერების სამინისტროსთან თანამშრომლობით, სამწლიანი პროექტის "არც ერთი ბავშვი განათლების გარეშე" ფარგლებში ჩაატარა. პროექტი საქართველოში ინკლუზიური განათლების გაძლიერებას ისახავს მიზნად.