პრეზიდენტ სალომე ზურაბიშვილს სურს, რომ მოქალაქეები, პოლიტიკოსები, დიპლომატიური კორპუსის წარმომადგენლები 16 ივნისს შეიკრიბონ და ევროკავშირს მოსახლეობის ევროპული არჩევანი აჩვენონ. ამავდროულად, ის ურჩევს 20 ივნისის ორგანიზატორებს, აქცია გადადონ.

რატომ არის მნიშვნელოვანი: ეს პირველი შემთხვევაა, როცა პრეზიდენტის რანგში ზურაბიშვილი შეკრებას აანონსებს.

• ევროკავშირის კანდიდატის სტატუსის მინიჭებისა და ევროპიდან კრიტიკული გზავნილების ფონზე, მოსახლეობის პოზიციის დაფიქსირება მნიშვნელოვანია, რასაც ისედაც აპირებდნენ სამოქალაქო აქტივისტები.
• 20 ივნისის აქციები გავრილოვის ღამის შემდეგ ყოველწლიურად იმართება —მოქალაქეები ანტისაოკუპაციო ლოზუნგებს აჟღერებენ და ადასტურებენ ერთგულებას დასავლური კურსის მიმართ.

რატომ გეგმავს 16 ივნისის შეკრებას: ზურაბიშვილ სურს, საღამოს 7 საათზე, ევროპის მოედანზე მივიდეს ყველა, რათა ერთიანობა და ქვეყნის ნება ვაჩვენოთ. პრეზიდენტმა განმარტა, რომ პოლიტიკური განცხადებებისთვის ტრიბუნა არ იქნება.

• "ეს იქნება საზოგადოება, მოსახლეობა ერთად დგომით, სადაც ყველა იქნება რიგითი მოქალაქე — მე, თქვენ და ნებნისმიერი, ან პოლიტიკური პარტიის წევრები, ან ხელისუფლების წარმომადგენლები, მაგრამ ყველა მოვა, როგორც რიგითი მოქალაქე".
• "მინდა მოვუწოდო ევროკავშირის ელჩს, რომ მოვიდეს ჩვენთან ერთად. ასევე, ევროკავშირის წევრი ქვეყნების ელჩებს, რომ შემოგვიერთდნენ".
• "ვთხოვ ყველა პარტიას და ხელისუფლებას, ყველას, ვისაც ევროპელობა აქვს განცხადებულ ან რეალურ მიზნად, რომ მოვიდეს და გადავდოთ ყველა სხვა ლოზუნგები და დაპირისპირება. ერთად დავდგეთ მიკროფონების გარეშე".

რატომ უნდა 20 ივნისის აქციის გადადება: ზურაბიშვილმა განაცხადა, რომ ეს შეკრება "ბევრ საფრთხეს უკავშირდება" და თუ ორგანიზატორები დაფიქრდებიან, შესაძლოა, გადაიდოს.

• მისი თქმით, ახლა არ არის "დრო პოლიტიკური ამბიციების გამოჩენის და საზოგადოების დაყოფის და გახლეჩის".
• "ამავდროულად, ვაფრთხილებ ხელისუფლებას, რაღაც განცხადებების შემდეგ. თუ მაინც ჩატარდა და ჩემი გადასაწყვეტი არ არის, მე შემიძლია მივმართო თხოვნით, თუ ჩატარდა ეს პროტესტი, ყოველივე ექსცესზე ხელისუფლების პასუხისმგელობა იქნება, რამეთუ დემონსტირების უფლება უნდა იყოს დაცული".

რა იგეგმება 20 ივნისს: სირცხვილიას და სხვა სამოქალაქო ჯგუფების ორგანიზებით, საღამოს 8 საათზე მოქალაქეები იკრიბებიან პარლამენტთან, რის შემდეგაც მსვლელობით წავლენ ევროპის მოედნისკენ.

• შეკრებილებს მიმართავენ სამოქალაქო საზოგადოების, უკრაინის ხელისუფლებისა და ევროკავშირის წარმომადგენლები.
• პარალელურად, ძალადობრივი ჯგუფები კონტრაქციით იმუქრებიან, თუმცა ამტკიცებენ, თითქოს შორიახლოს იქნებიან და მხოლოდ მაშინ ჩაერთვებიან, თუ "დაძაბულობა იქნება".

რას ამბობდა მთავრობა: პრემიერმინისტრმა ტრადიციული რიტორიკით აღნიშნა, თითქოს აქციას ნაციონალური მოძრაობა მართავს და ამით დისკრედიტაცია სცადა. მანვე აღნიშნა, რომ მთავრობა "კანონით მონიჭებული უფლებით და ძალით" დაიცავს მშვიდობას და სტაბილურობას.

• "ახლა ე.ი. ამ ყოველგვარი ჩავარდნის შემდეგ, როცა ვერც ომში ჩააბეს ქვეყანა და ვერც ვერაფერი გააკეთეს, უნდათ, რომ 20 ივნისს გამართონ აქცია თითქოს ევროკავშირში რაღაც ინტეგრაციის და სტატუსის მინიჭების მოთხოვნით".
• "მინდა, ყველა გავაფრთხილო, რომ ვინმეს ილუზია არ ჰქონდეს, მეგობრებო, ვინმე არ წამოეგოს ამ პროვოკაციას, არც ერთ უკანონო ქმედებას არავის ვაპატიებთ".