ორგანიზაციამ პარტნიორობა ადამიანის უფლებებისთვის (PHR) გაეროს ბავშვის უფლებათა კომიტეტში პირველი დავა მოიგო. როგორც ისინი აღნიშნავენ, ეს პირველი გადაწყვეტილებაა, როდესაც ბავშვთა სხეულებრივ დასჯასთან დაკავშირებით კომიტეტმა სახელმწიფოს დარღვევა დაუდგინა.

"კომიტეტმა დაადგინა, რომ სახელმწიფომ არ აიღო პასუხისმგებლობა იმის შესახებ, რომ ბავშვმა დაზიანებები საჯარო ბაღში ყოფნის პერიოდში მიიღო, ამიტომ სახელმწიფოს პასუხისმგებლობა მოექცა გაეროს ბავშვის უფლებათა კონვენციის მე-19 მუხლის ფარგლებში. კომიტეტმა, დაადგინა, რომ სახელმწიფომ აგრეთვე დაარღვია გამოძიების სტანდარტი და განმარტა, რომ ბავშვის მიმართ ძალადობის საქმეებზე გამოძიებას უნდა აწარმოებდნენ კვალიფიციური პროფესიონალები, ვისაც გავლილი აქვთ სპეციალური ტრენინგი და უნდა იყენებდნენ ბავშვის უფლებებზე დაფუძნებულ და ბავშვზე მორგებულ მიდგომებს", — ნათქვამია განცხადებაში.

საქმე 2017 წლის იანვარში ერთ-ერთ საჯარო ბაღში მომხდარ შემთხვევას ეხება. ორგანიზაციის ცნობით, აღმზრდელმა ბაღის მოსწავლეს სცემა. სახეზე დაზიანებების კვალი დედამ შეამჩნია და პოლიციას მიმართა. PHR-ის განცხადებით, ექსპერტიზამ დაასკვნა, რომ ბავშვს დაზიანებები ბლაგვი საგნით ჰქონდა მიყენებული.

ორგანიზაციაში ამბობენ, რომ პოლიციისგან პასუხი რამდენიმე თვის განმავლობაში არ ყოფილა. 2018 წლის აპრილში კი ბავშვის დედამ PHR-ს მიმართა. მათი განცხადებით, ადვოკატებმა არაერთხელ მოითხოვეს ძალადობის სათანადოდ გამოძიება და ზომების მიღება, თუმცა უშედეგოდ. 2018 წლის 8 ივნისს კი დაზარალებულის ცნობა მოითხოვეს — პროკურორმა მოთხოვნა არ დააკმაყოფილა. უწყების თქმით, ბავშვს დაზიანებები ძალადობის შედეგად არ ჰქონდა მიყენებული.

"პროკურორის უარი გიორგის ადვოკატებმა ზემდგომ პროკურორთან გაასაჩივრეს, თუმცა უშედეგოდ. პროკურატურამ გიორგის დაზარალებულად ცნობაზე უარი უთხრა. აღმზრდელი, რომელზეც გიორგი მიუთითებდა, სამსახურიდან გაათავისუფლეს, თუმცა მისი გათავისუფლების გადაწყვეტილებაში არ მიუთითეს გიორგის მიმართ ძალადობის შესახებ. ამიტომ სასამართლომ აღმზრდელის გათავისუფლება უკანონოდ ცნო და ის კვლავ ბაღში აღადგინა იმავე პოზიციაზე", — ამბობენ ორგანიზაციაში.

PHR-ის ცნობით, გაეროს ბავშვის უფლებათა კომიტეტს ადვოკატებმა 2018 წლის ნოემბერში მიმართეს. კომიტეტმა გადაწყვეტილება კი 2022 წლის 7 ივნისს მიიღო. შედეგად, სახელმწიფოს ბავშვისთვის კომპენსაციის გადახდა დაეკისრა.

"კომიტეტის განმარტების თანახმად სახელმწიფომ არ გამოიჩინა სათანადო გულმოდგინება და ვერ უზრუნველყო ბავშვის მიმართ სხეულებრივი დასჯის საქმეზე ეფექტური გამოძიების წარმოება, რითაც დაარღვია გაეროს ბავშვის უფლებათა კონვენციის მე-19 მუხლი", — აცხადებენ ისინი.

ამასთან, სახელმწიფომ 180 დღის ვადაში უნდა წარადგინოს ინფორმაცია აღნიშნულ გადაწყვეტილებასთან დაკავშირებით და უზრუნველყოს მისი გასაჯაროება. აგრეთვე, სახელმწიფომ უნდა გადადგას ყველა საჭირო ნაბიჯი მსგავსი დარღვევების პრევენცირებისთვის.