მისურის შტატში ქალს სადაზღვევო კომპანია Geico-სგან 5,2 მილიონი დოლარი გადაეცემა, რადგან სქესობრივი გზით გადამდები დაავადებით პარტნიორის ავტომობილში დაინფიცირდა, რომელიც სწორედ ამ კომპანიის მიერ იყო დაზღვეული. ქალმა Geico-ის წინააღმდეგ სასამართლოში შეიტანა სარჩელი, სადაც მიუთითა, რომ პარტნიორისგან პაპილომა ვირუსი სწორედ კომპანიის მიერ დაზღვეულ ავტომობილში გადაედო.

თავდაპირველად ქალმა 2021 წელს მიმართა სასამართლოს და ამტკიცებდა, რომ სადაზღვევო კომპანიას მისი ზარალი უნდა აენაზღაურებინა. ქალის თქმით, მისი დაინფიცირება დაზღვეულ ავტომობილში მოხდა, ხოლო კომპანიის ოფიციალურ დოკუმენტაციაში წერია, რომ "სადაზღვევო პოლისი დანაკარგებისა და დაზიანებების დაფარვას უზრუნველყოფს". ქალი Geico-ს 1 მილიონ დოლარს სთხოვდა, თუმცა კომპანიამ ამ თანხის გადახდაზე უარი განაცხადა.

კომპანიის უარის შემდეგ სასამართლომ საქმე არბიტრაჟს გადასცა. არბიტრაჟმა დაადგინა, რომ "დაზღვეულ ავტომობილში სექსუალურმა აქტივობამ უშუალოდ გამოიწვია ან ხელი შეუწყო ქალის პაპილომა ვირუსით დაინფიცირებას". არბიტრაჟის დადგენილებით, კომპანიამ ქალის ზიანის ასანაზღაურებლად 5,2 მილიონი დოლარი უნდა გადაიხადოს.

Geico-მ ამ გადაწყვეტილების გასაჩივრება სცადა და აღნიშნა, რომ კომპანიას ინტერესების დაცვის საშუალება არ მიეცა, თუმცა ეს უშედეგო აღმოჩნდა. Geico-ს საჩივარი არ დააკმაყოფილეს და სასამართლოს საბოლოო გადაწყვეტილებით, კომპანიამ ქალს 5,2 მილიონი დოლარი უნდა გადაუხადოს.