ცნობილი რუსი მწერალი და მეტროს ტრილოგიის ავტორი დმიტრი გლუხოვსკი რუსეთში ძებნილად გამოცხადდა.

გლუხოვსკი, რომელიც პუტინის პოლიტიკას ღიად უპირისპირდებოდა, რუსეთის უკრაინაში შეჭრის შემდეგ კი აქტიურად გმობდა თავისი ქვეყნის ქმედებებს, ცოტა ხნის წინ შინაგან საქმეთა სამინისტროს ძებნილთა სიაში აღმოჩნდა, თუმცა, დაკონკრეტებული არაა, რა მიზეზით. მონაცემთა ბაზაში მითითებულია, რომ მწერალზე ძებნა სისხლის სამართლის კოდექსით გათვალისწინებული ბრალდებით მიმდინარეობს.

ამბავს ტელეგრამის არხზე თავად მწერალიც გამოეხმაურა და აღნიშნა, რომ მზადაა, გაიმეოროს ის, რასაც ბოლო თვეების განმავლობაში ამბობდა.

"ინსტაგრამის პოსტში რუსეთის ფედერაციის შეიარაღებული ძალების დისკრედიტაციაში მედება ბრალი", — წერს გლუხოვსკი, — "207.3-ე მუხლის მეორე ნაწილით, დამამძიმებელი გარემოებაა რუსეთის ფედერაციის პრეზიდენტის დადანაშაულება უკრაინის წინააღმდეგ ომის დაწყებაში. მე მზად ვარ, გავიმეორო ყველაფერი, რაც წინათ ვთქვი: 'შეაჩერეთ ომი. აღიარეთ, რომ ეს ომი მთელი ერის წინააღმდეგაა მიმართული და შეწყვიტეთ ის'".

დმიტრი გლუხოვსკი ბოლო პერიოდში, სოციალურ ქსელებში აქტიურად მოუწოდებდა რუსეთის ხელისუფლებას ომის შეწყვეტისა და უკრაინიდან საოკუპაციო ჯარების დაუყოვნებლივ გამოყვანისკენ. მოგვიანებით, იგი ათობით რუსულენოვან მწერალს შეურთდა და რუსულად მოსაუბრე ადამიანებს მოუწოდა, ომის შესახებ სიმართლე ეთქვათ და სწორი ინფორმაცია გაევრცელებინათ.

გლუხოვსკის მსოფლიოში ყველაზე მეტად მეტროს ტრილოგიით იცნობენ, რომელიც 37 ენაზე ითარგმნა, მათ შორის, ქართულად. წიგნების მიხედვით შექმნილია პოპულარული ვიდეოთამაშიც.