გაეროს ადამიანის უფლებათა დაცვის ექსპერტი მარზუკი დარუსმანი რუსეთს მოუწოდებს, ექსტრადიციის თაობაზე ჩრდილოეთ კორეასთან თებერვალში ხელმოწერილი ხელშეკრულება არ აამუშავოს.

2016 წლის 2 თებერვალს ხელმოწერილი შეთანხმების საფუძველზე, რუსეთი ვალდებულებას იღებს, ექსტრადიციის გამოყენებით ჩრდილოეთ კორეაში დააბრუნოს ყველა ის ადამიანი, რომელმაც ფხენიანის შეფასებით, "უკანონოდ" დატოვა ქვეყნის ტერიტორია და "უკანონოდ" იმყოფება სხვა ქვეყანაში.

დარუსმანის თქმით, რუსეთის ფედერაციის ტერიტორიაზე 10 ათასამდე ჩრდილო კორეელია, ნაწილი ლეგალური სამუშაო კონტრაქტის ამოწურვის შემდეგ რუსეთის საემიგრაციო სამსახურს თავშესაფრის თხოვნით მიმართავს, ხოლო ბევრი მათგანი სამშობლოდან რეპრესიულ რეჟიმს გამოექცა და სხვა ქვეყნების გავლით რუსეთს შეაფარა თავი.

2015 წლის ნოემბერში რუსეთმა და ჩრდილოეთ კორეამ კრიმინალურ საქმეებზე თანამშრომლობისა და ექსტრადიციის შეთანხმებას მოაწერეს ხელი. დარუსმანის თქმით, თებერვლის ხელშეკრულება უფრო ფართო საკითხებს მოიცავს:

"ახალი ხელშეკრულება შემაშფოთებელია და რეპრესირებული ადამიანების ჩრდილოეთ კორეაში იძულებით დაბრუნებას გულისხმობს, სადაც მათი უფლებების დარღვევის საფრთხე არსებობს. ხელშეკრულების ამუშავება რუსეთის ფედერაციის საერთაშორისო ვალდებულებებთან წინააღმდეგობაში მოდის."

გაეროს კომისიის 2014 წლის ანგარიშით, ის ადამიანები, რომლებსაც ჩრდილოეთ კორეაში აბრუნებენ, წამების ხმვერპლები ხდებიან, ან უვადო პატიმრობა და სიკვდილით დასჯა ემუქრებათ.

დარუსმანი რუსეთს მოიწოდებს, პატივი სცეს საერთაშორისო ვალდებულებებსა და ადამიანის უფლებებს.