ცნობილმა მსახიობმა ჯიმ კერიმ ტვიტერზე დაწერა, რომ პირველი NFT შეიძინა — წყალტუბოს მიტოვებული სასტუმროს მიხედვით შექმნილი ნამუშევარი.

"ეს ნამუშევარი გაჩერებას მაიძულებს. როგორც ჯეიმზ ჯოისი ამბობს, ეს კარგია. მადლობა @ryankoopmans-ს ბუნების საუცხოო და უწყვეტი ხელახლა დაბადების დაფიქსირებისთვის. რომ იცოდეთ, ეს ჩემი პირველი NFT-ია", — წერს მსახიობი.

აღნიშნულ NFT-ს Devotion ჰქვია და იმ პროექტის ნაწილია, რომელიც საბჭოთა პერიოდის მიტოვებულ შენობებს ახალ სიცოცხლეს ჩუქნის:

"საბჭოთა კავშირის დროს საქართველოს ქალაქი წყალტუბო სამკურნალო წყლებითა და მდიდრული სანატორიუმით ცნობილი გამაჯანსაღებელი კურორტი იყო. 1940-1980 წლებში მას ათასობით ადამიანი, მათ შორის სტალინი და სხვა მაღალი თანამდებობის მოსკოველი პირები სტუმრობდნენ. საბჭოთა კავშირის დაშლის შემდეგ შენობები მიატოვეს", — ვკითხულობთ NFT-ის აღწერაში.

პროექტის ავტორებმა მიტოვებული შენობები მუსიკის ფონზე, ყვავილებთან და მცენარეებთან ერთად "აამოძრავეს" და უკაცრიელ ადგილებს სიცოცხლე დაუბრუნეს.

ამავე თემაზე:

შემდეგი პოდკასტი: NFT — ციფრული ხელოვნების მომავალი?!