23 მაისის ვაჭრობის შედეგად, ლარი დოლართან და ევროსთან მიმართებით გამყარდა.

დღეს დადგენილი კურსის მიხედვით, ლარი დოლართან მიმართებით 2,69 თეთრით გამყარდა და ერთი დოლარის ღირებულება 2,8767 ლარს გაუტოლდა. ეროვნული ვალუტა დოლართან მიმართებით ამაზე მეტად გამყარებული ბოლოს 2020 წლის მარტში იყო.

რაც შეეხება ევროს, ბოლო ერთ დღეში ლარი ამ ვალუტასთან მიმართებით 0,61 თეთრით გამყარდა და ერთი ევროს ღირებულება 3,0677 ლარი გახდა.

საინვესტიციო ბანკის თიბისი კაპიტალის შეფასებით, უკვე სახეზეა ლარის ზედმეტად გამყარების გარკვეული ნიშნები. ბანკი ამას ქვეყანაში დოლარის შემოდინებასა და გამკაცრებულ მონეტარულ პოლიტიკას უკავშირებს.

სებ-ის მიერ დღეს დადგენილი გაცვლითი კურსი ხვალ, 24 მაისს შევა ძალაში.