ფორმულა კრეატივი, რომლიც ამჟამად ტელეკომპანია რუსთავი 2-ისთვის ჩემი ცოლის დაქალებს იღებს, ახალი ინტერნეტ სერიალის გადაღებას აპირებს.

"გაჩნდა კომერციული ბაზისი, დაფინანსების წყაროები და შესაბამისად შესაძლებლობა რომ გავაკეთოთ მსგავსი ექსპერიმენტი და ინტერნეტი, როგორც მსოფლიოში აპრობირებული საშუალება, გამოვიყენოთ ამ ყველაფრისთვის. ახალი პროექტი მინისერიებად გავა და სრულმეტრაჟიანი არ იქნება", - ამბობს On.ge-სთან საუბრისას ირაკლი საღინაძე.

ახალი სერიალი მეგობრებზე იქნება, რომლებიც ახალ თავგადასავლებსა და სიახლეებს ეძებენ საკუთარ ცხოვრებაში.

"სერიალი იქნება მეგობრებზე, მათ ურთიერთობაზე, ადამიანის სურვილზე რომ საკუთარი ცხოვრება შეცვალოს და ყოველი დღე თავგადასავლად აქციოს, სწორედ ამას ნახავს ჩვენი მაყურებელი ამ სერიალში", - გვითხრა საღინაძემ.

ახალი, ინტერნეტ სერიალისთვის სცენარს ჩემი ცოლის დაქალებისა და ხელოვნური სუნთქვის სცენარისტი ქეთი დევდარიანი დაწერს და როგორც ფორმულა კრეატივში გვეუბნებიან, ეს იქნება სრული სიახლე, როგორც ფორმით ისე შინაარსით.

სერიალში მონაწილეობის მისაღებად უკვე კასტინგიც გამოცხადდა.