მეტროსადგურ ვარკეთილის რეკონსტრუქციისა და კაპიტალური რემონტისათვის 12 760 000 ლარი დაიხარჯება. თბილისის სატრანსპორტო კომპანიის მიერ გამოცხადებულ ტენდერში შპს სამშენებლო კომპანია მამისონმა გაიმარჯვა.

მამისონი და მისი მეწილეები

მამისონის 100%-იანი წილის მფლობელი შპს ევროდ ჰოლდინგია, რომელსაც, თავის მხრივ, სამი მეწილე ჰყავს: თორნიკე ჭკადუა (33%), ნიკოლოზ ჭკადუა (33%) და ირაკლი ჭკადუა (34%). ქართული ოცნების შემომწირველი ევორდ ჰოლდინგის 34%-იანი წილის მფლობელი ირაკლი ჭკადუაა. მან მმართველი პარტიის სასარგებლოდ 2017 წელს 10 000 ლარის ფულადი შემოწირულება გაიღო.

სამშენებლო კომპანია მამისონი სახელმწიფო უწყებების მხრიდან გამოცხადებული სხვა ტენდერებშიც მონაწილეობს. მათ შორის, უნდა აღინიშნოს, რომ კომპანია რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ გამოცხადებული მსხვილი ტენდერების გამარჯვებულია.

უფრო კონკრეტულად, მხოლოდ 2022 წელს, მამისონმა საავტომობილო გზების დეპარტამენტის მიერ გამოცხადებულ ორ ტენდერში გაიმარჯვა, რომელთა ხელშეკრულებების ჯამური ღირებულება 34 539 532 ლარია. ინფრასტრუქტურის სამინისტროს ტენდერები ზუგდიდი-ჯვარი-მესტია-ლასდილის საავტომობილო გზის მონაკვეთების რეაბილიტაციისთვის ჰქონდა გამოცხადებული.

როგორ განაწილდება ხარჯები ვარკეთილის მეტროსადგურის რეაბილიტაციისთვის

ტენდერში გამარჯვებული კომპანია რეაბილიტაციის პროექტით გათვალისწინებული სამუშაოებისთვის 3 752 095 ლარს, ხოლო ინტერიერის პროექტისთვის 9 007 905 ლარს დახარჯავს.

უფრო კონკრეტულად, ხელშეკრულებაში ხარჯები ასეა გადანაწილებული:

ფოტო: procurement.gov.ge

რა გაკეთდება ვარკეთილის მეტროსადგურში

ხელშეკრულების მიხედვით, სამუშაოები 2023 წლის ოქტომბრამდე უნდა დასრულდეს. სადგურის რეკონსტრუქცია სხვა სამუშაოებთან ერთად დაზიანებული შეკიდული ჭერის გამოცვლასაც გულისხმობს.

სატრანსპორტო კომპანიასა და ტენდერში გამარჯვებულ ფირმას შორის გაფორმებულ ხელშეკრულებაში სამუშაოები შემდეგნაირად არის გაწერილი:

  • საინჟინრო ქსელების შეკეთება-განახლება როგორც ცენტრალურ, ასევე ლოკალურ ნაწილში ადმინისტრაციულ და ტექნიკურ სათავსოებში;
  • საზოგადოებრივ სივრცეებში საინჟინრო ქსელების მოწყობა;
  • შიდა მოსაპირკეთებელი და კეთილმოწყობის სამუშაოები ტექნიკურ და ადმინისტრაციულ ნაწილში;
  • საზოგადოებრივ სივრცეებში სტრუქტურული ელემენტების მოწყობა: შეკიდული ჭერები და კედლების კონსტრუქციების დამუშავება;
  • კედლებისა და ჭერების ღებვა, კერამიკული ფილით მოპირკეთება, ქვის ზედაპირების პოლირება;
  • იატაკებისა და კიბის მოსაპირკეთებელი სამუშაოები: ლითონის ფურცლებითა და კერამოგრანიტის ფილებით;
  • ესკალატორის ბალუსტრადების გამოცვლა, სანათების, ელმოწყობილობებისა და სხვადასხვა ტექნოლოგიური მოწყობილობების მონტაჟი;
  • სამონტაჟო სამუშაოები: კარები, ვიტრაჟები, სალაროების სარკმლები, სკამები, ბანერები, მიმანიშნებლები, ტაქტილური ბილიკები და სხვა;
  • ტერიტორიის დასუფთავება, სამშენებლო ნარჩენების საბოლოო გატანა.

ვარკეთილის მეტროსადგურის ჭერი 2018 წლის 30 იანვარს ჩამოინგრა. შემთხვევის შედეგად 14 ადამიანი დაშავდა. ჭერის ჩამონგრევამდე სადგურის განახლებაზე კომპანია ყვარელმშენმა იმუშავა, რომელიც თბილისის მერიაში ელექტრონული ტენდერის გზით შეარჩიეს.

მეტრო ვარკეთილის რემონტის მიღება-ჩაბარების აქტში ხარისხის ექსპერტიზის დასკვნა არ მოიპოვებოდა. 2017 წელს ყვარელმშენის მიერ ვარკეთილის მეტროსადგურის განახლება ბიუჯეტს 347 852 ლარი დაუჯდა.