ადამიანთა უმეტესობა კარიერის განმავლობაში სხვადასხვა სამსახურს იცვლის, მაგრამ ბრაზილიელი უოლტერ ორტმენი გამონაკლისია. 100 წლის უოლტერმა ერთ კომპანიაში ხანგრძლივი მუშაობით გინესის რეკორდი დაამყარა. ის უკვე 84 წელია, კომპანია ReneauxView-ში მუშაობს.

უოლტერმა 15 წლის ასაკში დაიწყო გადაზიდვის ასისტენტად ტექსტილის კომპანიაში მუშაობა, რომელსაც მაშინ Industrias Renaux S.A. ერქვა. ეს 1938 წელს მოხდა და უოლტერის თქმით, მუშაობის დაწყება ოჯახის დასახმარებლად გადაწყვიტა, რადგან ფინანსური პრობლემები ჰქონდათ.

ფოტო: Guinness World Records

"1938 წელი ჯერ კიდევ ის დრო იყო, როცა ოჯახის შესანახად ბავშვები მუშაობდნენ. ოჯახის 5 შვილიდან მე ყველაზე უფროსი ვიყავი და დედამ ჩემთვის სამსახურის ძიება მაშინ დაიწყო, როცა 14 წლის ვიყავი" , — განაცხადა უოლტერმა.

უოლტერი მოგვიანებით გაყიდვების მიმართულებით დააწინაურეს, ახლა კი ის კომპანიის გაყიდვების მენეჯერის პოზიციას იკავებს. ბრაზილიელი კაცი ოფისში ყოველდღე დადის და ცოტა ხნის წინ მეგობრებთან და თანამშრომლებთან ერთად თავისი 100 წლის იუბილეც აღნიშნა.

ფოტო: Guinness World Records

უოლტერმა წელს თავისივე გინესის რეკორდი მოხსნა, რომელიც 2018 წელს ReneauxView-ში 80-წლიანი მუშაობის შედეგად დაამყარა. უოლტერი თავის რეკორდს "საამაყო მიღწევად" მიიჩნევს, თუმცა მისივე თქმით, "ამას ადრე ვერასდროს წარმოიდგენდა".

"ბევრს არაფერს ვგეგმავ და წინასწარ არც ხვალინდელ დღეზე ვფიქრობ. მე ვიცი, რომ მომდევნო დღეს გავიღვიძებ, ავდგები, ვივარჯიშებ და სამსახურში წავალ. ადამიანი აწმყოთი უნდა დაკავდეს და არა წარსულითა და მომავლით. მხოლოდ აქ და ახლა არის მნიშვნელოვანი", — ამბობს 100 წლის უოლტერი.