რუსეთის ჰუმანიტარული რეაგირების უწყებათაშორისი საკოორდინაციო შტაბის განცხადებით, 5,6 და 7 მაისს, მოსკოვის დროით 08:00-დან 18:00 საათამდე აზოვსტალიდან მშვიდობიანი მოსახლეობის ევაკუაციისთვის ჰუმანიტარულ დერეფნებს გახსნიან. ინფორმაციას სახელმწიფო მედია ტას ავრცელებს.

რუსეთი ამტკიცებს, რომ ევაკუაციის პროცესში საომარ მოქმედებებს შეწყვეტენ. მათი თქმით, სამხედრო დანაყოფებს უსაფრთხო დისტანციაზე გაიყვანენ და უზრუნველყოფენ მშვიდობიანი მოსახლეობის გაყვანას სხვადასხვა მიმართულებით, როგორც უკრაინის ტერიტორიაზე, ისე რუსეთში.

30 აპრილს აზოვსტარლიდან მოსახლეობის ევაკუაცია დაიწყო. უკრაინის პრეზიდენტის, ვოლოდიმირ ზელენსკის განცხადებით ტერიტორიიდან გაიყვანეს 100-მდე ადამიანი, თუმცა ქარხანაში კვლავ რჩებიან მშვიდობიანი მოქალაქეები და სამხედროები. უკრაინის ეროვნული გვარდიის მე-12 ოპერატიული ბრიგადის მეთაურმა განაცხადა, რომ ქარხანაში 200-მდე ადამიანია დარჩენილი, მათ შორის 20 ბავშვია.

ევაკუაციის შემდეგ ქარხანაზე თავდასხმა განახლდა, დღეს კი რუსი სამხედროები აზოვსტალის ქარხანაში შეიჭრნენ.

მარიუპოლი ომის დაწყების პირველივე დღეებიდან ალყაშია. რუსული დაბომბვების გამო განადგურებულია ქალაქის ინფრასტრუქტურა და დაღუპულია ათასობით მშვიდობიანი მოქალაქე. დიდი ხნის განმავლობაში, საოკუპაციო ძალები აბრკოლებდნენ მწვანე დერეფნების მუშაობას და ჰუმანიტარული ტვირთის შეტანას.