საქართველოს პარლამენტის წევრი საპარლამენტო უმრავლესობიდან, ქართული ოცნებიდან, ზაქარია ქუცნაშვილი ფიქრობს, რომ ქვეყანაში მოქალაქეების სამართლებრივი დაცვის მექანიზმი ნაკლოვანია. ამის შესახებ ქუცნაშვილმა რუსთავი 2-ის ეთერში გამოხატვის თავისუფლების შეზღუდვასა და იუსტიციის უმაღლესი საბჭოს ინიციატივაზე საუბრისას განაცხადა.

"გეტყვით რაშია პრობლემა. დღეს როგორ არის, შეუძლია ადგეს თქვენი დირექტორი [ნიკა გვარამია, რუსთავი 2-ის დირექტორი] მთელ საქართველოს შეურაცხყოფა მიაყენოს და მერე თქვას ხანდაზმულია [ჩემი განცხადება]. სტანდარტი რომ მიმართო სამოქალაქო სასამართლოს და იქ დაიცვას, გლეხმა, ჟურნალისტმა, თუ მოსამართლემ საკუთარი პატივი და ღირსება ძალიან რთულია," - თქვა ქუცნაშვილმა.

იუსტიციის უმაღლესმა საბჭომ 26 აპრილს საჯარო განცხადება გაავრცელა. უწყება დაუშვებლად მიიჩნევს მოსამართლეთა მიმართ იმ კრიტიკულ გამონათქვამებს, რაც ბოლო პერიოდში, მათ მიმართ, რუსთავი 2-ის ეთერით ჟღერდებოდა. ამავე წერილში აღნიშნულია ისიც, რომ ეთიკური პრინციპების დარღვევის გამო, ეთიკის ქარტია არ ითვალისწინებს ჟურნალისტისთვის სანქციის დაწესებას.

ჟურნალისტური ეთიკის ქარტია მსგავს შეზღუდვებს ცენზურის დაწესების მცდელობად მიიჩნევს და აცხადებს, რომ გამოხატვის თავისუფლების არსებული სტანდარტი არავითარ შემთხვევაში არ უნდა გაუარესდეს.