აშშ-ში, ქალაქ ჩიკაგოს ჩრდილოეთით მცხოვრებმა წყვილმა — რობ და გრეისი ჯოუნსებმა — ცოტა ხნის წინ თავიანთი 1959 წელს აშენებული სახლის გარემონტება გადაწყვიტა. როცა საქმეს შეუდგნენ, ალბათ ვერაფრით წარმოიდგენდნენ, რომ ლამის არქეოლოგიურ აღმოჩენას გააკეთებდნენ.

"რობი სააბაზანოში იყო და ტუალეტის ქაღალდის ძველ სამაგრს ცვლიდა", — იხსენებს გრეისი, — "როცა სამაგრი კედლიდან გამოაძრო, შეამჩნია, რომ მას რაღაც ნაჭრის მაგვარი მოჰყვა".

"ნაჭრის მაგვარი" კი, არც მეტი, არც ნაკლები, 60-წლიანი ისტორიის მქონე საკვები აღმოჩნდა — წყვილმა კედელში ჩაბეტონებული, ნახევრად შეჭმული კარტოფილი ფრი აღმოაჩინა.

"იმ მომენტში ერთმანეთს შევყურებდით და ვფიქრობდით, პოლიციაში უნდა დაგვერეკა თუ არა, რადგან დანაშაულის სცენის მტკიცებულება აღმოვაჩინეთ", — ჰყვება გრეისი, — "გულზე მოგვეშვა, როცა მივხვდით, რომ, უბრალოდ, მაკდონალდსის შეფუთვა იყო".

შეფუთვის გახსნისას შიგ ჰამბურგერის შესახვევი ქაღალდი და რამდენიმე გაყავისფრებული კარტოფილი იპოვეს.

ფოტო: Gracie Jones

წყვილი აღფრთოვანდა, როცა შენიშნეს, რამდენად კარგად იყო საკვები შენახული ათწლეულების შემდეგაც კი. თუმცა, კარტოფილ ფრის მისთვის დამახასიათებელი მარილიანი სურნელი, ცხადია, აღარ ჰქონდა. გრეისის თქმით, შესახედაობის მიუხედავად, კარტოფილის ნაჭრები ქვასავით მტკიცე იყო.

შეფუთვაზე გამოყენებული ლოგოს მიხედვით, ჯოუნსებმა დაასკვნეს, რომ მათი აღმოჩენა 1955-დან 1961 წლამდე პერიოდით თარიღდება.

წყვილმა ასევე გაიგო, რომ მაკდონალდსის ერთ-ერთი პუნქტი მათ მახლობლად 1959 წელს აშენდა — იმავე წელს, როცა მათი სახლის აგება დასრულდა.

ახლა კი, ჯოუნსებს ძველისძველი საკვები სათავსოში აქვთ შენახული და არ იციან, რა მოუხერხონ.

"გაყიდვა გაგვიხარდებოდა, თუმცა, თუ ეს ვერ მოვახერხეთ, ალბათ ისტორიულ არტეფაქტად დავიტოვებთ", — ამბობს გრეისი.