ბრიტანელმა დეპუტატმა, ნეილ პერიშმა, თანამდებობა მას შემდეგ დატოვა, რაც აღიარა, რომ პარლამენტის სხდომის დროს პორნოს ორჯერ უყურა. დეპუტატის თქმით, პირველად პორნოსაიტზე შემთხვევით მოხვდა, თუმცა მეორედ პორნო საკუთარი სურვილით ჩართო.

თავდაპირველად დეპუტატს კონსერვატიულმა პარტიამ ბრალდებების გამო თანამდებობა შეუჩერა. პერიშის ორი კოლეგა ქალი ამტკიცებდა, რომ მათ დაინახეს, თუ როგორ უყურებდა დეპუტატი პორნოებს თემთა პალატის სხდომის დროს, როცა მათ გვერდით იჯდა. ახლა კი თავად დეპუტატმაც აღიარა, რომ სხდომის დროს პორნოებს უკვე ორჯერ უყურა.

ფოტო: BBC

"სასაცილოა, მაგრამ თავიდან ტრაქტორებს ვათვალიერებდი. შემდეგ კი სხვა ვებგვერდზე შევედი, რომელსაც მსგავსი სახელი ჰქონდა და პორნო აღმოჩნდა, მაგრამ ცოტა ხანს ვუყურე და ეს არ უნდა გამეკეთებინა. თუმცა ამაზე უფრო დიდი დანაშაული ისაა, რომ თემთა პალატის სხვა სხდომაზე პორნოსაიტი საკუთარი სურვილით ჩავრთე", — ამბობს დეპუტატი.

დეპუტატმა აღიარა, რომ თემთა პალატაში ყოფნის დროს პორნოსაიტს მეორედ მაშინ ეწვია, როცა კენჭისყრა მიმდინარეობდა და შედეგების გამოცხადებას ელოდა. მისივე თქმით, ის აცნობიერებს თუ რამხელა ემოციური ზიანი მიაყენა ამ საქციელით საკუთარ ოჯახს, საარჩევნო ოლქსა და პარტიას.

"მე შევცდი, სულელურად მოვიქეცი და გონება დავკარგე", — განაცხადა პერიშმა და ამ აღიარების შემდეგ თანამდებობაც დატოვა.