საქართველოს პრემიერმინისტრის, ირაკლი ღარიბაშვილის განცხადებით, ევროკავშირის წევრობის კითხვარს ევროკომისიას 13 მაისამდე გადასცემენ. ამის შესახებ მან დღეს, მთავრობის სხდომაზე ისაუბრა.

"მიმდინარეობს მუშაობა მეორე ნაწილზე, რომელიც უფრო ვრცელი დოკუმენტია, დაახლოებით, 2 300 კითხვაა მოცემული და 33 თავისგან შედგება მეორე ნაწილი ტექნიკური, სექტორული და დარგობრივი მიმართულებით, ამიტომ ამას ჩვენ 13 მაისამდე, უფრო ადრეც გადავცემთ ევროკავშირს", — განაცხადა მან.

ამასთან, ღარიბაშვილის თქმით, უკვე შეავსეს კითხვარის პირველი ნაწილი, რომელსაც ევროკავშირის ელჩს საქართველოში, კარლ ჰარცელს დღეს გადასცემენ.

საქართველოს ევროკავშირის წევრობის კითხვარი 11 აპრილს გადასცეს. ქვეყანამ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.