შინაგან საქმეთა სამინისტროს განცხადებით, იდენტიფიცირებულია პირი, რომელიც თბილისის ქუჩებში კატის მსგავს სიმბოლოებს ხატავდა.

"სისხლის სამართლის დანაშაულის ნიშნები არ გამოიკვეთა, დაწყებულია ადმინისტრაციული სამართალწარმოება. რეაგირებისთვის საქმე გადაეცემა შესაბამისს სამსახურს", — განუცხადეს On.ge-ის შსს-ში.

გარდა ამისა, უწყებაში ამბობენ, რომ იდენტიფიცირებული არასრულწლოვანი, რომელიც ფალიაშვილის ქუჩაზე ამ სიმბოლოებს საღებავით ღებავდა.

ერთნაირი ნახატები, სავარაუდოდ, რუსულენოვანი წარწერით თბილისის რამდენიმე ქუჩაზე ბოლო დღეებში გაჩნდა. სოციალურ ქსელში მოქალაქეები წერდნენ, რომ სიმბოლოები ძირითადად მიწისქვეშა გადასასვლელებთან, სარდაფებთან და მიწისქვეშა ავტოსადგომებთან იყო დახატული. ისინი მოუწოდებდნენ შსს-სა და სუს-ს ამოეღოთ დამონტაჟებული კამერების კადრები და ჰქონოდათ შესაბამისი რეაგირება.

"კატის" სიმბოლოებმა არაერთი თეორია გააჩინა, მათ შორის იმაზე, რომ ამას რუსეთის მოქალაქეები აკეთებდნენ. სოციქლურ ქსელში ნახატებს უკრაინაში ომის დაწყებამდე გაკეთებულ მონიშვნებთან აკავშირებდნენ. მომხმარებელთა ნაწილი კი ფიქრობდა, რომ ეს რომელიმე კომპანიის სარეკლამო სტრატეგიის ნაწილია.