უკრაინის პრეზიდენტის ვოლოდიმირ ზელენსკის თანაპარტიელი და მისი ნდობით აღჭურვილი პირი, დავით არახამია აცხადებს, რომ საქართველოს ხელისუფლების დღევანდელი განცხადებები გულს უტეხს. მისი თქმით, ამ საკითხს ოდესმე დაუბრუნდებიან, თუმცა ახლა არ სცალიათ.

"პირველი რამდენიმე დღე იყო პოზიცია, რომ უკრაინა, ალბათ, უნდა ჩაბარდეს და არავინ არ გვეხმარებოდა, მაგრამ შემდეგ, როდესაც დაინახეს, რომ მართლაც ჩავებით ბრძოლაში და ღირსეულ წინააღმდეგობას ვუწევთ, დაიწყო საერთო სიტუაციის ცვლილება ამერიკაშიც, მათ შორის ამომრჩევლების ხარჯზე. არამხოლოდ კრიტიკოსების, არამედ ამომრჩევლის ხარჯზე, რომლებიც აწვებიან პოლიტიკოსებს და პოლიტიკოსები იძულებული ხდებიან თქვან ის, რასაც დღეს ამბობენ.

იგივე ხდებოდა იმ ქვეყნებში, რომლებიც ევროპის ლიდერები არიან, მაგრამ უფრო რუსეთზე დამოკიდებული ქვეყნები არიან. საფრანგეთი გერმანია, რომლებიც ახლა ანტირუსულ რიტორიკას იყენებენ, მაგრამ თავიდან გაცილებით უფრო რბილები იყვნენ, ანუ სხვა ქვეყნებიც ნელ-ნელა იცვლიან მიმართულებას. იმედი მაქვს, რომ ოდესმე ამას საქართველოც გააკეთებს იმიტომ, რომ დღევანდელი განცხადებები საქართველოს ხელისუფლებისა, რბილად რომ ვთქვათ, გულს მიტეხს", — თქვა მან მთავარი არხის ეთერში. [მთავარი არხის თარგმანი]

მისივე თქმით, საუბრები იმაზე, რომ ქართული ბანკების საშუალებით რუსეთი გვერდს უვლის სანქციებს ან როდესაც პრეიერმინისტრი ამბობს, რომ უკრაინა ისჯება, თითქოს მიუთითებს იმას, რომ რუსეთი მართალია.

"როდესაც საუბარია, რომ ქართული ბანკების მეშვეობით რუსეთი გვერდს უვლის სანქციებს ან პრემიერმინისტრი ამბობს, რომ უკრაინა ისჯება, უკრაინამ ვერ აიცილა ომი, თითქოს მიუთითებს, რომ რუსეთი მართალია, რომ რუსეთი ყოჩაღია და მივიდა ვიღაცის დასასჯელად.

ამას ოდესმე დავუბრუნდებით, არ გვცალია ახლა, უბრალოდ, ამისთვის. დრო არ გვაქვს, მაგრამ ჩემი აზრით, ქართველმა ხალხმა უნდა შეაფასოს ეს. ჩემი თაობაც, ჩემს თაობამდეც, ჩემი თაობის შემდეგაც თითოეულ ქართველს იგივე ტკივილი დააქვს გულით, სამხრეთ ოსეთიც და აფხაზეთიც. ყველას გვინახავს რა არის რუსული აგრესია, ამიტომ ასეთი განცხადებები ქართველის პირით... მეც უკვე ალმაცერად მიწყებენ ყურებას, როგორ ხდება, რომ ქართველები — ყოველთვის ყველაზე თავისუფლებისმოყვარე ხალხი იყო და ახლა პოლიტიკურ დონეზე ასეთი განცხადებები კეთდება. ერთი მხარეა სამზარეულოში ილაპარაკო ეს, თუ გეშინია, მეორე მხარეა, როდესაც ტელევიზორით აცხადებ ამას", — ამბობს არახამია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში