ახალი საქართველოს წევრის, ლევან ხაბეიშვილის, მიერ გამოქვეყნებული ვიდეოს შესახებ, რომელშიც ლისის ტბის მიმდებარე ტერიტორიაზე დამწვარი ხეები ჩანს, თბილისის მერი, დავით ნარმანია აცხადებს, რომ ამ ტერიტორიაზე ხანძარი რამდენიმე წლის წინ მოხდა, რის შემდეგაც მერიამ ადგილზე ახალი ხეები დარგო.

"ეს არის ნახანძრალი ხეები, როცა რამდენიმე წლის წინ ბალახს გაუჩნდა ცეცხლი და ამდენი ხე დაიწვა. სირცხვილია მათი ასეთი ქცევა, ვინც ცდილობს, რომ დეზინფორმაციით მოსახლეობა შეცდომაში შეიყვანოს, ეს არის ნახანძრალი ტერიტორია, რომლის საკომპენსაციოდაც იქ ძალიან ბევრი ხე დაირგო".

ნარმანია განცხადების გამავრცელებლებსაც მოუწოდებს, რომ ადგილზე ხეები დარგონ:

"უკეთესი იქნება ჯერ გაერკვნენ სიტუაციაში და მერე გველაპარაკონ და კიდევ უფრო უკეთესი იქნება, ბარს მოკიდონ ხელი და დარგონ რაც შეიძლება მეტი ხე, თუ ასე შესტკივათ გული ქალაქზე და მის გამწვანებაზე. დარგონ ხეები, გაამწვანონ და მოუარონ. განცხადებების გაკეთება ადვილია, თან უპასუხისმგებლო ადამიანებისგან უპასუხისმგებლო განცხადებები, რომლებიც ჩვენ არაერთი მოგვისმენია".

ვიდეოს კომენტარებში ლევან ხაბეიშვილი წერს, რომ ხის ძირებში არსებული ნაცარი მიუთითებს, რომ ხეებს ცეცხლი რამდენიმე წლის წინ არ წაკიდებია, თუმცა ნარმანია აცხადებს, რომ ინფორმაცია ტყუილია, რომლის დასადასტურებლადაც ძველი ფოტოები ქვეყნდება.

დავით ნარმანიას თქმით, ტერიტორია კერძო კომპანიის საკუთრებაშია, რომელიც არ ადასტურებს გავრცელებულ ცნობებს იმის თაობაზე, რომ აღნიშნულ ადგილას მშენებლობა შეიძლება დაიწყოს.