წყნეთში მოკლული კაცის საქმეზე პოლიციელს ბრალი წარუდგინეს. პროკურატურა მას გაუფრთხილებლობით სიცოცხლის მოსპობისა და სამსახურებრივი უფლებამოსილების გადამეტებას ედავება.

მათი ცნობით, პოლიცია შემთხვევის ადგილზე ნარკოტიკული საშუალების უკანონოდ შეძენა-შენახვის შესახებ მიღებული ინფორმაციის გადამოწმების მიზნით მივიდა. პროკურატურის თქმით, კაცია მიწაში რაღაცას ეძებდა, რა დროსაც პოლიციელი მასთან მივიდა და უთხრა, რომ დაკავებული იყო.

უწყება განმარტავს, რომ კაცმა მიწიდან ამოღებული ნივთი გადაყლაპა და გაქცევა სცადა, რა დროსაც, მათივე ცნობით, პოლიციელმა გაუფრთხილებლობით გაისროლა, რის შედეგადაც კაცი გარდაიცვალა.

"მიწიდან გაურკვეველი ნივთის ამოღებისთანავე, მასთან მივიდა პოლიციის დეტექტივი, რომელსაც ხელში ეჭირა ცეცხლსასროლი იარაღი და განუცხადა, რომ იგი იყო დაკავებული. მამაკაცმა მიწიდან ამოღებული ნივთი გადაყლაპა და გაქცევა დააპირა, პოლიციელმა სცადა მისი დაკავება და შებოჭვა, რა დროსაც საბრძოლო მდგომარეობაში მოყვანილი სამსახურებრივ-საშტატო ცეცხლსასროლი იარაღიდან გაუფრთხილებლობით განახორციელა გასროლა, რასაც მამაკაცის გარდაცვალება მოჰყვა", — ვკითხულობთ პროკურატურის განცხადებაში.

სპეციალური საგამოძიებო სამსახურის განცხადებით, შემთხვევა 18 აპრილს მოხდა, მოკლული კი 30 წლის კაცია.

პოლიციელს ბრალდება საქართველოს სისხლის სამართლის კოდექსის 116-ე მუხლის პირველი ნაწილით (სიცოცხლის მოსპობა გაუფრთხილებლობით) და 333-ე მუხლის მე-3 ნაწილის "ბ" ქვეპუნქტით ( მოხელის მიერ სამსახურებრივი უფლებამოსილების გადამეტება, იარაღის გამოყენებით) წარედგინა, რაც 5-დან 8 წლამდე პატიმრობას ითვალისწინებს.