მოლაპარაკებებზე უკრაინის დელეგაციის წევრმა, მიხაილ პოდოლიაკმა განაცხადა, რომ რუსები ძალიან ხშირად იყენებენ საჯარო განცხადებებს ზეწოლისთვის და მოუწოდა მედიას, ისინი "ნიუსმეიქერებად" არ აქციონ. ასე გამოეხმაურა ის კრემლის პრესსპიკერის, დმიტრი პესკოვის განცხადებას უკრაინისთვის "მკაფიო ფორმულირებების" დოკუმენტის გადაცემაზე, რომელზეც "პასუხს ელოდებიან".

პოდოლიაკმა აღნიშნა, რომ რუსეთმა გამოთქვა თავისი პოზიციები, რომელსაც შეისწავლიან და შესაბამის დასკვნებს გამოიტანენ.

"ბევრად უკეთესია მხოლოდ უკრაინული მხარის ოფიციალურ განცხადებებს დაეყრდნოთ. იმიტომ, რომ რუსები ძალიან ხშირად იყენებენ საჯარო განცხადებებს მხოლოდ სავალდებულო ზეწოლის ელემენტად. რატომ უნდა შეუწყოთ ხელი მათ?" — განაცხადა მან.

პრეზიდენტის ადმინისტრაციის უფროსის მრჩეველმა ხაზი გაუსვა, რომ უკრაინამ, ჯერ კიდევ სტამბულის რაუნდის ფარგლებში გადასცა რუსეთს თავისი მოსაზრებები, ახლა კი მათი უნდა განიხილონ.

"მათ შორის, უსაფრთხოების გარანტიების, რომელიც ჩვენი ქვეყნის შემდგომი აგრესიისგან დაცვის გარანტია. რუსულმა მხარემ შეისწავლა წინადადებები და გამოთქვა თავისი საპირისპირო პოზიციები. ჩვენი ჯერია შევისწავლოთ, შევადაროთ, გამოვიტანოთ დასკვნები, მათ შორის პოლიტიკური და სამართლებრივი", — თქვა პოდოლიაკმა.

უკრაინასა და რუსეთს შორის მოლაპარაკებების ბოლო რაუნდი 29 მარტს სტამბულში შედგა, როდესაც დელეგაციები ერთმანეთს შეხვდნენ, მანამდე იყო ორი ქვეყნის საგარეო საქმეთა მინისტრების შეხვედრა.

ამ ეტაპზე მოლაპარაკებების პროცესი გაყინულია. როგორც უკრაინის პრეზიდენტის ოფისის ხელმძღვანელის მრჩეველი მიხაილო პოდოლიაკი ამბობს, რთულია იმის თქმა, როდის შედგება მოლაპარაკებების შემდეგი პირდაპირი დიალოგი. მისი თქმით, რუსეთი ომის მე-2 ფაზაზე დიდ ფსონს დებს.

უკრაინის პრეზიდენტი ვოლოდიმირ ზელენსკი და საგარეო საქმეთა მინისტრი დმიტრო კულება ამბობენ, რომ მარიუპოლი მოლაპარაკებების პროცესში, შესაძლოა წითელი ხაზი გახდეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.