ამერიკელი კაცი სასამართლოს გადაწყვეტილებით 450 ათას დოლარს მიიღებს, რადგან თავის ყოფილ კომპანიას გათავისუფლების გამო უჩივლა. კაცი სამსახურიდან იმის გამო გაათავისუფლეს, რომ დაბადების დღის წვეულება მისი ნების საწინააღმდეგოდ მოუწყვეს, რაზეც მან "გაბრაზება" ვერ დამალა.

"კევინ ბერლინგს შფოთვითი აშლილობა აქვს, რაც პანიკურ შეტევებს იწვევს", — ნათქვამია სამსახურიდან გათავისუფლებული კაცის სასამართლოს დასკვნაში. როგორც გაირკვა, კევინს პანიკური შეტევის ეშინოდა და თანამშრომლებს უთხრა, რომ დაბადების დღის აღნიშვნა არ სურდა, მაგრამ მას არ დაუჯერეს და "სიურპრიზი" მაინც მოუწყვეს.

სამსახურში ბევრი ადამიანის დანახვისას კევინს პანიკური შეტევა დაეწყო და წვეულებას მალევე გაეცალა. მეორე დღეს კევინს უფროსები ასეთი რეაქციის გამო საჯაროდ დაუპირისპირდნენ და გააკრიტიკეს, რამაც განმეორებითი პანიკის შეტევა გამოიწვია.

"ყურადღების ცენტრში ყოფნა კევინისთვის ძალიან სტრესულია", — ამბობს კევინის ადვოკატი. ამ ინციდენტის შემდეგ კევინი ერთი კვირა სახლიდან მუშაობდა, შემდეგ კი გაათავისუფლეს. უფროსებმა ამის მიზეზად წვეულების გამო კევინის "გაბრაზება" დაასახელეს და აღნიშნეს, რომ მან თანამშრომლებს სადღესასწაულო განწყობა ჩაუშხამა.

კევინმა თავის კომპანიას სასამართლოში უჩივლა და მოსამართლის გადაწყვეტილებით, კომპენსაციად 450,000 დოლარს მიიღებს. ადვოკატმა განაცხადა, რომ კევინი ყოველთვის შესანიშნავი თანამშრომელი იყო კომპანიისთვის, ახლა კი მომხდარის გამო თერაპიას გაივლის. მართალია, კევინმა სასამართლო მოიგო, თუმცა კომპანიას ჯერ კიდევ შეუძლია, რომ მოსამართლის განაჩენი გაასაჩივროს.