უკრაინის ყველაზე მდიდარმა ადამიანმა, რინატ ახმეტოვმა, პირობა დადო, რომ ქალაქ მარიუპოლის აღსადგენად ყველაფერს გააკეთებს. რინატ ახმეტოვი უკრაინელი ბიზნესმენია, რომელიც მარიუპოლში ორ ფოლადის ქარხანას ფლობს.

"მარიუპოლი გლობალური ტრაგედიისა და გმირობის მაგალითია. ჩემთვის მარიუპოლი ყოველთვის უკრაინის ქალაქი იყო და იქნება. მე მჯერა, რომ ჩვენი მამაცი ჯარისკაცები დაიცავენ ქალაქს, თუმცა მესმის, ეს მათთვის როგორი რთული და მძიმეა", — ამბობს ახმეტოვი Reuters-თან ინტერვიუში.

ფოტო: Getty Images

ახმეტოვი უკვე დიდი ხანია, უკრაინის უმდიდრეს ადამიანად ითვლება, თუმცა მისი ქონება 2014 წლიდან შემცირდა, როცა რუსეთმა ყირიმის ნახევარკუნძულის, დონეცკისა და ლუგანსკის ანექსია დაიწყო. ფორბსის მიხედვით, ახმეტოვის ქონება 2013 წლისთვის 15,4 მილიარდი დოლარი იყო, დღევანდელი მონაცემებით კი ახმეტოვი 3,9 მილიარდ დოლარს ფლობს.

"ჩვენთვის ომი 2014 წელს დაიწყო. ჩვენ დავკარგეთ მთელი ჩვენი ქონება როგორც ყირიმში, ასევე დროებით ოკუპირებულ დონბასში. მე დარწმუნებული ვარ, რომ უკრაინის ომის შემდგომ რეკონსტრუქციაში SCM გადამწყვეტ როლს ითამაშებს. ჩვენ ნამდვილად დაგვჭირდება საერთაშორისო რეკონსტრუქციის გეგმა უკრაინის აღსადგენად. მე მჯერა, რომ ამ ომში გამარჯვების შემდეგ თავისუფალ, ევროპულ, დემოკრატიულ და წარმატებულ უკრაინას ყველა ერთად აღვადგენთ", — დასძინა ახმეტოვმა.