ევროპული საქართველოს ლიდერის, გიგა ბოკერიას განცხადებით, ნაციონალური მოძრაობა და ლელო გააზრებულად თუ გაუაზრებლად რეჟიმის დემოკრატიულ ფასადად იქცნენ. ასე ეხმაურება ის ქართულ ოცნებასთან ერთად დელეგაციაში ოპოზიციური პარტიების უკრაინაში წასვლას.

"ამ გუნდებს, პოლიტიკურ ჯგუფებს თითქოს აქვთ იგივე პოზიცია, რაც აქვს ევროპულ საქართველოს რომ ეს არის პუტინისტური რეჟიმი, ეს მათი სიტყვებია. თუ ისინი ასე თვლიან და გულწრფელები არიან ამ შეფასებაში, აუხსნან საზოგადოებას რატომ თვლიან პუტინისტურ-კოლაბორაციონისტულ რეჟიმის დეკორაციად ყოფნას და მათთან, როგორც თვითონ ეძახიან თანამშრომლობას მნიშვნელოვან საკითხებზე საჭიროდ ჩვენი ქვეყნისთვის. თვლიან, რომ ერთი ვიზიტით უკრაინაში არსებითად იცვლება ქართული ოცნების ივანიშვილისა და მისი გარემოცვის პოლიტიკა? ანუ ამაშია არსი?!" — განაცხადა მან.

ბოკერიას თქმით, მათი ამოცანა რეჟიმის შეცვლაა, საპარლამენტო ოპოზიციის ნაბიჯებით კი ეს ამოცანა ზიანდება. ამასთან, ბოკერია დასძენს, რომ ეს ზიანს აყენებს ქვეყნის შიგნით საზოგადოების მობილიზაციასაც. ის, ასევე, აღნიშნავს, რომ ერთი მხრივ, რეჟიმისთვის პუტინისტის წოდება, მეორე მხრივ, კი მათ დელეგაციასთან ერთად წასვლას, საზოგადოებისთვის, სულ მცირე, დამაბნეველია.

"ევროპული საქართველო ვთვლით მნიშვნელოვნად, რომ ამ საკითხზე მოქალაქეებს მივაწოდოთ ჩვენი პოზიცია. მკაფიოდ დავაფიქსიროთ ჩვენი განსხვავება ნაციონალური მოძრაობისგან, ლელოსგან, საპარლამენტო ოპოზიციისგან, ამავე დროს მათ ჰქონდეთ წნეხი ჩვენი საზოგადოებისგან რათა ახსნან თავისი პოზიცია ან შეცვალონ თავისი პოზიცია. ეს ძალიან მნიშვნელოვანია იმ საქმეში, რასაც ჩვენი ქვეყნის ხელისუფლების მშვიდობიანი შეცვლა, ივანიშვილის რეჟიმის ჩამოცილება და ჩვენი ქვეყნის სამშვიდობოს გასვლა ამ ჭაობიდან ჰქვია", — აღნიშნავს ის.

8 აპრილს საქართველოში უკრაინის საქმეთა დროებითმა რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევდა, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა უკრაინის რადას თავმჯდომარემ კოლეგას.

გუშინ კი სტეფანჩუკმა განაცხადა, რომ 13 აპრილს პაპუაშვილთან ოფიციალური ზარი ექნება და კიდევ ერთხელ დაუდასტურებს მოწვევას. დღეს პაპუაშვილმა დაწერა, რომ უკრაინაში მისი ვიზიტი მნიშვნელოვან როლს შეასრულებს. როდის ჩავა ის უკრაინაში არ დაუკონკრეტებია. ამასთან, როგორც გუშინ, 12 აპრილს გახდა ცნობილი, საპარლამენტო დელეგაცია უკრაინაში ჩასვლას კვირის ბოლომდე გეგმავს. დელეგაციის წევრებს შორის, სავარაუდოდ, იქნებიან დავით სერგეენკო, ბექა ოდიშარია და არჩილ თალაკვაძე.

ამავე თემაზე: