უკრაინის პრეზიდენტის ადმინისტრაციის მრჩევლის, ალექსეი არესტოვიჩის განცხადებით, მარიუპოლის 36-ე საზღვაო ბრიგადამ ალყა გაარღვია და აზოვის ბატალიონს შეუერთდა. ეს ის დანაყოფია, რომლის სახელითაც რამდენიმე დღის წინ განცხადება გავრცელდა — ისინი ამბობდნენ, რომ მარიუპოლში გადარჩენის შანსები აღარ აქვთ, რადგან შეიარაღება ამოეწურათ და ბოლო ბრძოლისთვის ემზადებოდნენ.

მაშინ მარიუპოლის მერის მოადგილემ ამ ინფორმაციას ყალბი უწოდა, თუმცა დღეს არესტოვიჩი წერს, რომ 36-ე ბრიგადა განადგურებას გადაურჩა.

"მარიუპოლში, 36-ე საზღვაო ბრიგადის ქვედანაყოფებმა, რთული და ძალიან სარისკო მანევრის შედეგად, გარღვევა შეძლეს და აზოვის პოლკს შეუერთდნენ, რომელმაც პროფესიონალურად უზრუნველყო ეს ღონისძიება.

შედეგები? პირველი —"აზოვმა" არსებითი გაძლიერება მიიღო. მეორე — 36-ე ბრიგადა გადაურჩა განადგურებას და მიიღო დამატებითი სერიოზული შესაძლებლობები, ფაქტობრივად, მოიპოვა მეორე შანსი. მესამე — ქალაქის დამცველებმა, ახლა ერთად, სერიოზულად გააძლიერეს თავიანთი თავდაცვითი ტერიტორია. საერთო ჯამში, გაიზარდა და გაძლიერდა ქალაქის თავდაცვის სისტემა.

აი, რა ხდება, როდესაც ოფიცრები არ კარგავენ თავს და მტკიცედ ინარჩუნებენ ჯარების მართვას. მოდი, ჩვენც არ დავკარგოთ. ჯარმა იცის რას აკეთებს", — წერს ის.

მარიუპოლის მცველები 47 დღე აქტიურ თავდასხმებს იგერიებდნენ. ქალაქი ბლოკირებულია რუსი ოკუპანტების მიერ — ვერ ხერხდება ევაკუაცია ან ჰუმანიტარული დახმარების შეტანა. უკრაინის პრეზიდენტმა განაცხდა, რომ ქალაქში ათიათასობით ადამიანია დაღუპული.

11 აპრილს 36-ე ბრიგადის სახელით გავრცელებული განცხადების შემდეგ, Facebook-ზე უკრაინის შეიარაღებული ძალების მთავარსარდალმა, ვალერი ზალუჟნიმ დაწერა, რომ უკრაინელ სამხედროებთან სტაბილურ, ღია კავშირზე არიან და აკეთებენ "შეუძლებელსა და შესაძლებელს".