ვლადიმერ პუტინმა და ალექსანდრ ლუკაშენკომ უარყვეს ბუჩას ხოცვა-ჟლეტვაში თავისი ბრალეულობა. პუტინი ამბობს, თითქოს გავრცელებული კადრები და ინფორმაციები "ფეიკია", ლუკაშენკო კი ამას "ბრიტანელების ფსიქოლოგიურ ოპერაციას" უწოდებს.

საერთო პრესკონფერენციისას ლუკაშენკო ამტკიცებდა, რომ აქვს დაზვერვის მონაცემები, რომლებშიც ჩანს, როგორ დაგეგმეს და განახორციელეს ბრიტანელებმა "ოპერაცია". პუტინმა კი თქვა, რომ მსგავსი "პროვოკაციების მოწყობას სირიაშიც ცდილობდნენ, როცა ბაშარ ასადს ქიმიური იარაღის გამოყენებაში ადანაშაულებდნენ, თუმცა გამოჩნდა, რომ ეს ფეიკია. ასეთივე ფეიკია ბუჩაც".

პუტინის თქმით, "სპეცოპერაცია" ანუ ომი გეგმის მიხედვით მიმდინარეობს და მათი ამოცანაა მიაღწიონ ყველა დასახულ მიზანს. მან არ დაიშურა პროპაგანდა იმაზე, რომ რუსები, ბელარუსები და უკრაინელები მოძმე ხალხია და იქვე თავის მართლებაც სცადა, ტრადიციულად დასავლეთზე თავდასხმით:

"რაც უკრაინაში ხდება ტრაგედიაა, მაგრამ რუსეთს არჩევანი არ ჰქონდა. ბუჩას რაც შეეხება, ჩემს დასავლელ კოლეგებს ვეკითხები, იყავით სირიაში?"

მას შემდეგ, რაც რუსულმა ჯარებმა კიევის მიმდებარე ტერიტორიები დატოვეს, გაირკვა, რომ ოკუპანტებმა ბუჩასა და ბოროდიანკაში ასეულობით ადამიანი აწამეს და დახოცეს. ქუჩაში მოკლულთა კადრები საერთაშორისო მედიებმა გადაიღეს. ბუჩის ხოცვა-ჟლეტვა იხილა არაერთმა მსოფლიო ლიდერმაც. ამის მიუხედავად რუსეთი თავის ბრალეულობას არ იმჩევს და ცდილობს, უკრაინას დააბრალოს.

7 აპრილს ბუჩას მერმა, ანატოლი ფედორუკმა განაცხადა, რომ აღმოჩენილი ცხედრების რაოდენობა დღითიდღე იზრდება. მისი თქმით, ბუჩაში მოკლული მშვიდობიანი მოსახლეობის რიცხვი ბოლო მონაცმებით 320-ს შეადგენდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში