უკრაინის 36-ე საზღვაო ბრიგადა ამბობს, რომ ალყაში მოქცეულ მარიუპოლში დღეს შესაძლოა გადამწყვეტი ბრძოლა იყოს, რადგან საბრძოლო მასალა იწურება. ბრიგადა წერს, რომ ისინი 47 დღეა მარიუპოლს იცავენ და ბევრი თანამებრძოლი დაკარგეს. მათ ფეისბუქპოსტს სხვადასხვა საერთაშორისო მედიები ავრცელებენ.

"ჩვენ ვართ 36-ე საზღვაო ბრიგადა, კონტრადმირალ მიხაილო ბილინსკის სახელობის, რომელმაც 2014 წელს ერთგულების ფიცის ღალატის გარეშე დატოვა ყირიმი და ღირსეულად განაგრძო უკრაინის დაცვა. ომის დაწყებიდან 47 დღეა მარიუპოლს ვიცავთ. გვაბომბავდნენ თვითმფრინავებიდან, გვესროლეს არტილერიიდან, ტანკებიდან და სხვა ცეცხლსასროლი იარაღიდან. ჩვენ ღირსეულად დავიცავით თავი, ვაკეთებდით შეუძლებელს, მაგრამ ნებისმიერი რესურსი იწურება. [...] დღეს იქნება, სავარაუდოდ, გადამწყვეტი ბრძოლა, რადგან შეიარაღება არ დაგვრჩა. შემდეგ იქნება ხელჩართული ბრძოლა, შემდეგ ვიღაცებისთვის სიკვდილი, ვიღაცებისთვის კი ტყვეობა", — ვკითხულობთ განცხადებაში.

დღეს უკრაინის პრეზიდენტმა, ვოლოდიმირ ზელენსკიმ განაცხდა, რომ მარიუპოლში ათიათასობით ადამიანია დაღუპული.