2022 წლის ევროვიზიაზე საქართველოს წარმომადგენელი ჯგუფის, ცირკუს მირკუსის, საკონკურსო სიმღერის — Lock Me In — ვიდეოკლიპი გამოვიდა. სიმღერის პრემიერა ჯერ კიდევ 9 მარტს შედგა, თუმცა, უკრაინისადმი სოლიდარობის ნიშნად, ის ვიდეორგოლის გარეშე, მხოლოდ აუდიოვერსიად გავრცელდა.

ჯგუფი ცირკუს მირკუსი წლევანდელი ევროვიზიის სიმღერის კონკურსზე საქართველოს წარმომადგენლად საზოგადოებრივმა მაუწყებელმა 2021 წლის ნოემბერში დაასახელა. როგორც ცოტა ხნის წინ გახდა ცნობილი, ჯგუფი კონკურსის მეორე ნახევარფინალურ ტურში, 12 მაისს, მე-5 ნომრად წარდგება მაყურებლის წინაშე.

ბუქმეიკერების საერთო რეიტინგში საქართველო ამ დროისთვის 32-ე ადგილს იკავებს, ხოლო ევროფანების აპლიკაციაში ბოლო, მე-40 პოზიციაზეა. აღსანიშნავია, რომ საქართველოს ევროვიზიის ფინალში 2016 წლის შემდეგ არ უმღერია, კონკურსზე 13 მონაწილეობის შემდეგ კი ქვეყნის საუკეთესო შედეგად მე-9 ადგილი რჩება, რომელიც 2010 წელს სოფო ნიჟარაძემ და 2011-ში ჯგუფმა Eldrine დაიკავა.

რიგით 66-ე ევროფესტივალს, რომელშიც 40 ქვეყანა მონაწილეობს, იტალიის ქალაქი ტურინი 10, 12 და 14 მაისს უმასპინძლებს. აღსანიშნავია, რომ რუსეთი ევროვიზიის წლევანდელ კონკურსში მონაწილეობას ვერ მიიღებს. ღონისძიების ორგანიზატორმა ევროპის მაუწყებელთა კავშირმა გადაწყვეტილება მას შემდეგ მიიღო, რაც პუტინის უკრაინაში შეჭრის საპასუხოდ ევროვიზია 2022 წლის მონაწილე მომღერლებმა და ქვეყნებმა ევროფესტივალიდან რუსეთის მოხსნა მოითხოვეს. ამასთან, მაუწყებელთა კავშირმა ორგანიზაცია დაატოვებინა რუსულ ტელეკომპანიებსაც, შესაბამისად, უცნობია, შეძლებს თუ არა ქვეყანა მომავალში კონკურსზე დაბრუნებას.

რაც შეეხება უკრაინას, 2022 წლის ევროვიზიაზე ქვეყანას ჯგუფი KALUSH ORCHESTRA წარადგენს, სიმღერით Stefania. აღსანიშნავია, რომ სანამ ჯგუფის წევრები საკუთარი ქვეყნის დასაცავად იბრძვიან, უკრაინას ბუქმეიკერები წლევანდელ ევროვიზიაზე გამარჯვებას უწინასწარმეტყველებენ.