ძალიან ცოტა თანამედროვე ავტორი თუ დაიკვეხნის ისეთი პოპულარობით, როგორიც ახალგაზრდა ირლანდიელ მწერალს, სალი რუნის, ხვდა წილად. მწერლის სამივე რომანი ბესტსელერად იქცა და ათობით ენაზე ითარგმნა, თუმცა, მკითხველები განსაკუთრებული მოლოდინით მის მესამე წიგნს ელოდებოდნენ, რომელიც 2021 წელს გამოვიდა.

Beautiful World, Where Are You ("მშვენიერო სამყარო, სად ხარ") გასული წლის ნამდვილ სენსაციად იქცა — წიგნის მაღაზიის რიგიდან გამოცემიდან პირველივე კვირაში გაყიდულ თითქმის 50 ათას ეგზემპლარამდე. ახლა კი, ამ წიგნის მშობლიურ ენაზე წაკითხვის საშუალება ქართულენოვან მკითხველსაც ექნება — რომანს, ავტორის წინა ორი წიგნის მსგავსად, სულაკაურის გამომცემლობა გამოსცემს, მთარგმნელი კვლავ გურამი ღონღაძე იქნება.

Beautiful World, Where Are You-ის სიუჟეტი ოთხი მთავარი გმირის გარშემო ვითარდება: მწერალი ელის კელეჰერი, მისი პარტნიორი — საწყობის თანამშრომელი ფელიქს ბრედი, ელისის მეგობარი და ჟურნალის რედაქტორი, აილინ ლაიდენი და ლაიდენის მეგობარი, ლტოლვილთა სააგენტოს თანამშრომელი საიმონ კოსტიგენი. პერსონაჟების ასეთი მრავალფეროვანი გალერეა რუნისთვის დამახასიათებელია, მით უმეტეს, რომ ამ წიგნში თანამედროვე სამყაროსათვის აქტუალური თემები: სიყვარული, არასტაბილური სოციალური მდგომარეობა და სოციალური კლასია განხილული.

ალბათ სწორედ ამის გამოა, რომ რომანი ბევრი ადამიანის სადარდებელს გამოეხმაურა — და ეს მხოლოდ გაყიდვების მაჩვენებელზე არ ასახულა. თითქმის 70 ათასი ხმით წიგნმა შარშან მკითხველების უდიდესი ვებპლატფორმის, Goodreads-ის პრიზი მოიპოვა მხატვრული ლიტერატურის კატეგორიაში.

რუნიმ წიგნის წერა 2018 წელს დაიწყო, სანამ მისი მეორე რომანი, ჩვეულებრივი ადამიანები, გამოიცემოდა. ტექსტის დიდი ნაწილი სარეზიდენციო პროგრამის ფარგლებში, 2019 წლის შემოდგომაზე, ნიუ-იორკში, დაიწერა. რომანის სათაური კი ავტორმა შუბერტის კომპოზიციის მოსმენისას მოიფიქრა.

"მგონი, იმის განცდა, რომ მშვენიერი სამყარო ხელიდან გვეცლება, თანამედროვეობისთვის დამახასიათებელია, პოლიტიკური სიტუაციისა და კლიმატის კრიზისის გამო", — ამბობს რუნი, — "თუმცა, რეალურად, ამ გამოცდილების აღსაწერი კულტურული ტერმინოლოგია ჩვენს დღევანდელ გარემოებებს წინ უსწრებს, რაც ჩემთვის საინტერესოა".

სხვათა შორის, სულაკაურის გამომცემლობამ სალი რუნის წინა ორი რომანი გასულ წელს გამოსცა. ორივე მათგანი საქართველოშიც ბესტსელერად იქცა. წიგნების წარმატებას ხელი შეუწყო ეკრანიზაციებმაც — ჩვეულებრივი ადამიანების მიხედვით Emmy-ის ნომინანტი სერიალი გადაიღეს, საუბრები მეგობრებთან კი BBC-მ ასევე მინისერიალად აქცია, რომელსაც მაყურებელი მალე იხილავს.