2022 წლის ევროვიზიაზე საქართველოს წარმომადგენელი ჯგუფი ცირკუს მირკუსი კონკურსის ნახევარფინალურ ტურში მე-5 ნომრად წარდგება. მეორე ნახევარფინალი, რომელშიც საქართველო მიიღებს მონაწილეობას, 12 მაისს შედგება.

ორ ნახევარფინალურ ტურში მონაწილეთა რიგითობა კი ასეთია:

პირველი ნახევარფინალი, 10 მაისი

  1. ალბანეთი
  2. ლატვია
  3. ლიეტუვა
  4. შვეიცარია
  5. სლოვენია
  6. უკრაინა
  7. ბულგარეთი
  8. ნიდერლანდები
  9. მოლდოვა
  10. პორტუგალია
  11. ხორვატია
  12. დანია
  13. ავსტრია
  14. ისლანდია
  15. საბერძნეთი
  16. ნორვეგია
  17. სომხეთი

მეორე ნახევარფინალი, 12 მაისი

  1. ფინეთი
  2. ისრაელი
  3. სერბეთი
  4. აზერბაიჯანი
  5. საქართველო
  6. მალტა
  7. სან-მარინო
  8. ავსტრალია
  9. კვიპროსი
  10. ირლანდია
  11. ჩრდილოეთ მაკედონია
  12. ესტონეთი
  13. რუმინეთი
  14. პოლონეთი
  15. მონტენეგრო
  16. ბელგია
  17. შვედეთი
  18. ჩეხეთის რესპუბლიკა

ჯგუფი ცირკუს მირკუსი წლევანდელი ევროვიზიის სიმღერის კონკურსზე საქართველოს წარმომადგენლად საზოგადოებრივმა მაუწყებელმა 2021 წლის ნოემბერში დაასახელა. ერთ-ერთ ყველაზე მასშტაბურ მუსიკალურ ღონისძიებაზე ბენდი სიმღერას Lock Me In შეასრულებს. აღსანიშნავია, რომ უკრაინისადმი სოლიდარობის ნიშნად კომპოზიცია ვიდეოკლიპის გარეშე გამოვიდა.

ბუქმეიკერების საერთო რეიტინგში საქართველო ამ დროისთვის 29-ე ადგილს იკავებს, ხოლო ევროფანების აპლიკაციაში ბოლოდან მეორე, 39-ე პოზიციაზეა. აღსანიშნავია, რომ საქართველოს ევროვიზიის ფინალში 2016 წლის შემდეგ არ უმღერია, კონკურსზე 13 მონაწილეობის შემდეგ კი ქვეყნის საუკეთესო შედეგად მე-9 ადგილი რჩება, რომელიც 2010 წელს სოფო ნიჟარაძემ და 2011-ში ჯგუფმა Eldrine დაიკავა.

რიგით 66-ე ევროფესტივალს, რომელშიც 40 მონაწილეობს, იტალიის ქალაქი ტურინი 10, 12 და 14 მაისს უმასპინძლებს. აღსანიშნავია, რომ რუსეთი ევროვიზიის წლევანდელ კონკურსში მონაწილეობას ვერ მიიღებს. ღონისძიების ორგანიზატორმა ევროპის მაუწყებელთა კავშირმა გადაწყვეტილება მას შემდეგ მიიღო, რაც პუტინის უკრაინაში შეჭრის საპასუხოდ ევროვიზია 2022 წლის მონაწილე მომღერლებმა და ქვეყნებმა ევროფესტივალიდან რუსეთის მოხსნა მოითხოვეს. ამასთან, მაუწყებელთა კავშირმა ორგანიზაცია დაატოვებინა რუსულ ტელეკომპანიებსაც, შესაბამისად, უცნობია, შეძლებს თუ არა ქვეყანა მომავალში კონკურსზე დაბრუნებას.

რაც შეეხება უკრაინას, 2022 წლის ევროვიზიაზე ქვეყანას ჯგუფი KALUSH ORCHESTRA წარადგენს, სიმღერით Stefania. აღსანიშნავია, რომ სანამ ჯგუფის წევრები საკუთარი ქვეყნის დასაცავად იბრძვიან, უკრაინას ბუქმეიკერები წლევანდელ ევროვიზიაზე გამარჯვებას უწინასწარმეტყველებენ.