აჭარის ავტონომიური რესპუბლიკის თავმჯდომარემ, თორნიკე რიჟვაძემ ამდენი ხნის შემდეგ ჟურნალისტების კითხვის პასუხად პირველად თქვა, რომ უკრაინაში ომი რუსეთმა დაიწყო. ფორმულას ჟურნალისტმა, რიჟვაძეს უთხრა, რომ მისი რჩევა გაითვალისწინეს და "დარგის ექსპერტებს" მიმართეს და კვლავ ჰკითხა რას ფიქრობს თავად — ვინ დაიწყო ომი უკრაინაში.

"მე თავიდანვე იგივე პოზიცია მქონდა, რაზეც მოგახსენეთ და თუ თქვენთვის კითხვას წარმოადგენდა, მემგონი არ ხართ ღირსი, რომ გიპასუხოთ, ისე რუსეთის ფედერაციამ დაიწყო, იცოდით ალბათ თავიდანვე", — უპასუხა რიჟვაძემ ჟურნალისტს.

7 მარტს რიჟვაძემ პირდაპირ არ უპასუხა კითხვას, ვინ დაიწყო ომი უკრაინაში და თქვა, რომ ამისთვის ჟურნალისტებმა საერთაშორისო სასამართლოს და დარგის ექსპერტებს უნდა მიმართონ.

ამის შემდეგ, 9 მარტს მან ფეისბუქზე პოსტი გამოაქვეყნა, სადაც წერდა, რომ "შესაბამისი პასუხი" გასცა კითხვას, ვინ დაიწყო ომი უკრაინაში. რიჟვაძემ თქვა, რომ შეკითხვა "რიტორიკულ-პროვოკაციული" იყო. თუმცა, მას არც ამ პოსტში დაუსახელებია, ვინ დაიწყო ომი და ტექსტის დიდი ნაწილი ოპონენტების კრიტიკას დაუთმო.