მთავრობამ რიყის დოქები აუქციონის წესით 10 020 000 ლარად გაყიდა. ტერიტორია 14 591 კვ.მ. არასასოფლო-სამეურნეო მიწის ნაკვეთსა და მასზე განთავსებული შენობა-ნაგებობას მოიცავს.

აუქციონის დოკუმენტების მიხედვით, ინვესტორმა მომავალი სამი წლის განმავლობაში არანაკლებ 20 მილიონი ლარის ინვესტიცია უნდა განახორციელოს. როგორც ირკვევა, ადგილზე მუზეუმები, საგამოფენო სივრცეები და დარბაზები უნდა შეიქმნას. ამასთან, ინვესტორი ვალდებულია ვალდებულებების შესრულებიდან არანაკლებ 10 წლის განავლობაში ტერიტორიაზე შექმნილ სივრცეებს პროფილი შეუნარჩუნოს.

რიყის დოქების პრივატიზაციის მიზნით, აუქციონი სულ 7-ჯერ გამოცხადა, საიდანაც ექვს შემთხვევაში აუქციონი არ შედგა. აღსანიშნავია, რომ თავდაპირველად მთავრობა ამ ობიექტს 95 მილიონ ლარად აფასებდა.