ბრიტანეთის თავდაცვის სამინისტროს დაზვერვის განცხადებით, უკრაინის კონტრშეტევები წარმატებულია, რაც დიდი ალბათობით, კიევში რუსეთის შეტევის განახლებას შეაფერხებს. ამის შესახებ დაზვერვა Twitter-ზე წერს.

"უკრაინა კიევის ჩრდილო-აღმოსავლეთის რუსულ ძალებზე ზეწოლას ზრდის. რუსული ძალები ამ ღერძის ირგვლივ უკვე განიცდიან რესურსების პრობლემებს. უკრაინული ძალები რუსული ძალების წინააღმდეგ დედაქალაქის მიმდებარედ წარმატებით ახორციელებენ საპასუხო დარტყმებს და სავარაუდოდ, დაიბრუნეს მაკარივი და მოსჩუნი.

რეალური შესაძლებლობა არსებობს, რომ ახლა უკრაინულმა ძალებმა ბუჩაში და ირპენში რუსული დანაყოფების ალყაში მოქცევა მოახერხონ. სავარაუდოა, რომ უკრაინის წარმატებული კონტრშეტევები კიევის მიმართულებით რუსული ძალების ხელახალი შეტევისა და რეორგანიზაციის შესაძლებლობას ხელს შეუშლის".

ზუსტად ერთი თვის წინ, 24 თებერვალს ვლადიმერ პუტინმა უკრაინაში ომი დაიწყო. რუსეთმა უკვე დაკარგა ათასობით ჯარისკაცი, მოკლა ასეულობით ბავშვი და ათასობით მშვიდობიანი მოქალაქე, დაანგრია ათეულობით ქალაქი და ათასობით საცხოვრებელი სახლი, თუმცა კვლავ არ აღიარებს, რომ ომს აწარმოებს და მას "სამხედრო ოპერაციას" უწოდებს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში