სავაჭრო ცენტრ საბას მიმდებარედ ავეჯის მაღაზიაში ხანძარი გაჩნდა. საგანგებო სიტუაციების მართვის სამსახურის ინფორმაციით, ხანძრის შესახებ ინფორმაცია მათ უწყებაში დაახლოებით 16 საათისთვის დაფიქსირდა.

როგორც უწყებაში აცხადებენ, ხანძარი დაახლოებით 60 მ2-ზე იყო, სახანძრო სამსახურის ხუთმა მანქანამ კი მისი ლიკვიდაცია გამოძახებიდან რამდენიმე წუთში შეძლო.

შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 188-ე მუხლის მიხედვით მიმდინარეობს. ამ მუხლით, სხვისი ნივთის დაზიანება ან განადგურება გაუფრთხილებლობით, რამაც მნიშვნელოვანი ზიანი გამოიწვია ისჯება ჯარიმით ან გამასწორებელი სამუშაოთი ვადით ერთ წლამდე ანდა თავისუფლების შეზღუდვით ვადით ორ წლამდე. იგივე ქმედება, ჩადენილი ცეცხლთან ან მომეტებული საფრთხის წყაროსთან გაუფრთხილებელი მოპყრობით ისჯება ჯარიმით ან გამასწორებელი სამუშაოთი ვადით ორ წლამდე ან თავისუფლების შეზღუდვით ვადით სამ წლამდე ანდა თავისუფლების აღკვეთით ვადით ორ წლამდე. იმ შემთხვევაში, თუ შემთხვევას ადამიანის სიცოცხლე ემსხვერპლა სასჯელი სამიდან ხუთ წლამდე სასჯელია.

თბილისში სავაჭრო ობიექტში ხანძარი 30 იანვარსაც მოხდა. გამთენიისას გაჩენილი ხანძრის შედეგად სრულიად განადგურდა ბავშვთა სამყაროს შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.