ამერიკული Vogue-ისთვის მიცემულ ინტერვიუში სუპერმოდელმა, ბელა ჰადიდმა, თავის გამოცდილებაზე და კარიერის განმავლობაში წარმოქმნილ ბარიერებზე ღიად ისაუბრა.

25 წლის მოდელის თქმით, ნანობს, რომ თავისი წინაპრების გარეგნული ნიშან-თვისებები დაკარგა. ჰადიდმა რინოპლასტიკის ოპერაცია 14 წლის ასაკში გაიკეთა, თუმცა, ამ თემაზე საჯაროდ არასდროს უსაუბრია.

"ნეტავ, ჩემი წინაპრებისეული ცხვირი შემენარჩუნებინა", — ამბობს ჰადიდი, რომლის მამას პალესტინური ფესვები აქვს, — "მგონი, ამას შევეგუებოდი".

ბელას თქმით, თავისი არასრულფასოვნების შეგრძნება გარკვეულწილად იმან გამოიწვია, რომ თავის უფროს დასთან, ასევე ცნობილ სუპერმოდელ ჯიჯი ჰადიდთან, შედარებისას თავს უფრო უშნოდ მიიჩნევდა. მიუხედავად დების განსხვავებული გარეგნობისა, მათ დღემდე ხშირად ადარებენ ერთმანეთს.

"უფრო უშნო და ვიყავი", — იხსენებს ბელა, — "შავგრემანი ვიყავი და ისეთი მაგარი და კომუნიკაბელური ვერა, როგორიც ჯიჯი. ყოველ შემთხვევაში, ხალხი ამას ამბობდა ჩემზე. და, სამწუხაროდ, როცა რაღაცას ბევრჯერ გიმეორებენ, ამის დაჯერებას იწყებ".

• სოციალური მედია ყალბია — ბელა ჰადიდმა მენტალურ ჯანმრთელობაზე ილაპარაკა

ინტერვიუს გამოქვეყნებისთანავე ინტერნეტში გაცხარებული განხილვა დაიწყო თემის ირგვლივ და ადამიანები აღნიშნავდნენ, რომ ბელას "ევროცენტრულმა სილამაზის სტანდარტებმა" ადრეულ ასაკშივე აიძულეს გარეგნობის შეცვლა, რის გამოც საკუთარი წინაპრებისეული და კულტურული ნიშან-თვისებები დაკარგა.

თუმცა, სტანდარტებთან ერთად, ბელას მიღებულ გადაწყვეტილებებზე გავლენის მოხდენაში ბევრმა დების დედა, იოლანდა ჰადიდი, დაადანაშაულა. იოლანდას, რომელიც სატელევიზიო რეალითი შოუ The Real Housewives of Beverly Hills-ის ვარსკვლავი და ასევე ყოფილი მოდელია, ნიდერლანდური წარმომავლობა აქვს. იგი ბელასა და ჯიჯის მამაზე, მოჰამედზე, ექვსი წლის განმავლობაში იყო დაქორწინებული.

როგორც ეს რეალითი შოუში ვიხილეთ, იოლანდა თავისი შვილების ცხოვრებაში არცთუ იშვიათად ერეოდა და აკონტროლებდა, თუ რას ჭამდნენ ან იცვამდნენ, რომელ სპორტს მისდევდნენ და როგორ ფორმაში ჰქონდათ სხეული.

ინტერნეტმომხმარებლები დიდი ხანია, იოლანდას ევროცენტრული სილამაზის სტანდარტების თავისი შვილებისთვის თავსმოხვევაში ადანაშაულებენ — ქერათმიანი და ლურჯთვალება ჯიჯის "სულ მთლად ამერიკულ გოგოდ" არაერთხელ მოხსენიების გამო. შოუს ერთ-ერთ სერიაში იოლანდამ შვილები "შავ და თეთრ გედებადაც" მოიხსენია და აღნიშნა, რომ დებს შორის კი ყოველთვის იქნებოდა კონკურენცია, მაგრამ ბელა თავის გზას მაინც გაიკვლევდა.

"თუ ვიღაც შავგვრემან და ლურჯთვალება გოგოს ეძებს, ჯიჯი არ გამოადგება. მაგრამ თუკი სულ მთლად ამერიკელ გოგოს ეძებენ, ისინი ბელას არ აიყვანენ", — განაცხადა იოლანდამ.

მსგავსი რამ მან მოგვიანებითაც გაიმეორა, როცა W Magazine-ისთვის მიცემულ ინტერვიუში ჯიჯის ისევ "სულ მთლად ამერიკელი გოგო" უწოდა, ბელას კი "უფრო მუქგვრემანი და ეგზოტიკური".

ამ ყველაფრის გათვალისწინებით ბელას ფანები ახლაც ვარაუდობენ, რომ არასრულფასოვნების გრძნობა სუპერმოდელს ადრეულ ასაკში, შესაძლოა, დედამისის "სულ მთლად ამერიკული" გარეგნობით შეპყრობამ გაუჩინა. ზოგიერთმა ამაში მოჰამედიც დაადანაშაულა, რადგან რინოპლასტიკის ოპერაციის გასაკეთებლად 14 წლის ბელას მშობლების თანხმობა დასჭირდებოდა.

იოლანდას ევროპული სილამაზის სტანდარტებით შეპყრობის დასამტკიცებლად ფანებმა რეალითი შოუს კიდევ ერთი მომენტი გაიხსენეს, როცა ქალმა ვიზაჟისტს სთხოვა, ჯიჯის თვალები მოემრგვალებინა, რადგან "ამ მაკიაჟით ჩინელს ჰგავდა".

Vogue-თან ინტერვიუში კი ბელამ ასევე აღნიშნა, რომ წარსულში ანორექსია და "სხეულის ფორმასთან დაკავშირებული პრობლემები" აწუხებდა. მოდელის თქმით, მართალია, ახლა საკვებთან ჯანსაღი ურთიერთობა აქვს, თუმცა, წარსული ჩვევების შედეგად სარკეში იშვიათად თუ ჩაიხედება.

• ბელა ჰადიდს შფოთვის გამო ტანსაცმლის შერჩევისა და გარეთ გასვლის ეშინოდა

"ყოველთვის ვეკითხები საკუთარ თავს, როგორ აღმოჩნდა ამ საქმეში გოგო, რომელსაც წარმოუდგენელი კომპლექსები, შფოთვა, დეპრესია, სხეულის ფორმასთან და კვებასთან დაკავშირებული პრობლემები ჰქონდა და ვერ იტანდა შეხებას? თუმცა, წლების განმავლობაში ჩემგან კარგი მსახიობი დადგა. სახეზე ღიმილს ან ძლიერ გამომეტყველებას ვიფარებ. ყოველთვის მეგონა, რომ რაღაც უნდა დამემტკიცებინა", — ამბობს ბელა.

სხვათა შორის, კვებასთან დაკავშირებული პრობლემების ხსენებისას ბევრმა ისევ იოლანდა გაიხსენა, როცა ჯიჯის დედა გამოსაშვებ საღამოზე ნამცხვრის ჭამის გამო გაუწყრა და შეახსენა, რომ "გამხდარი ფორმა უნდა შეენარჩუნებინა".

"იოლანდა ჰადიდს არ უნდოდა, ჯიჯის ნამცხვარი ეჭამა, მაგრამ მშობლის ნებართვას ხელი მოაწერა, რომ თავისი 14 წლის შვილს ცხვირის ოპერაცია გაეკეთებინა", — წერს ტვიტერის ერთ-ერთი მომხმარებელი.