უკრაინის სახალხო დამცველის, ლუდმილა დენისოვას განცხადებით ნინო ლომჯარიას უკრაინაში ჩასვლის სურვილი აქვს და ამჟამად ისინი არკვევენ უსაფრთხოების საკითხებს.

"მე დღეს მივიღე შეტყობინება, რომ მას სურვილი აქვს ჩამოვიდეს უკრაინაში, ჩვენ ვსწავლობთ საკითხს, რომ იყოს უსაფრთხო. ეს უპირველეს ყოვლისა, ეხება მის უსაფრთხოებას. ჩვენ ძალიან დიდ მადლობას ვუხდით მას მხარდაჭერისთვის, რომელიც გამოხატა", — განაცხადა დენისოვამ ფორმულას ეთერში.

ლომჯარიას განცხადებით, ომის დაწყების დღიდან ფიქრობს, თუ როგორ შეიძლება უკრაინელი ხალხისა და მათი სახელმწიფოს მიმართ სოლიდარობის გამოხატვა, უკრაინაში ვიზიტი კი ერთ-ერთი საკითხია, რომელიც მონახაზის დონეზე განიხილება უკრაინელ კოლეგებთან.

"დღეს გავრცელდა ინფორმაცია უკრაინაში ჩემ შესაძლო ვიზიტთან დაკავშირებით. ომის დაწყების დღიდან ვფიქრობ როგორ შეიძლება გამოვხატო სოლიდარობა უკრაინელი ხალხის და მათი სახელმწიფოს მიმართ. ერთ-ერთი საკითხია ვიზიტი უკრაინაში, რომელიც იდეის და მონახაზის დონეზე განიხილება ჩვენ უკრაინელ კოლეგებთან. უსაფრთხოების ინტერესებიდან გამომდინარე ბუნებრივია მეტ დეტალზე არ და ვერ ვისაუბრებ.

წარმატებები უკრაინას და გმირ უკრაინელ ხალხს!", — წერს ლომჯარია ფეისბუქგვერდზე.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში