მთავარი არხის ჟურნალირსტი აცხადებს, რომ ზუგდიდში ალტ ინფოს ოფისში დაახლოებით 15 ადამიანი ტელეკომპანიის გადამღებ ჯგუფს თავს დაესხა. მისი თქმით, ალტ ინფოს ოფისთან იღებდნენ იმას, თუ როგორ შლიდნენ უკრაინის მხარდამჭერ წარწერებს ქალაქის მერიის დაქვემდებარებული სამსახურის თანამშრომლები, რა დროსაც მას და მის ოპერატორს თავს დაესხნენ.

"ალტ ინფოს ოფისში ვიყავით გადაღებაზე და ვცდილობდით ოფისის ერთ-ერთ წარმომადგენელთან ინტერვიუს ჩაწერას, ამ დროს გვერდით დაახლოებით 4 მანქანა ერთდროულად გაჩერდა და ორგანიზებულად გადმოვიდნენ მანქანიდან. ისინი კასტეტებით იყვნენ შეიარაღებული და თავს დაგვესხნენ. ოპერატორს დაახლოებით 8 კაცი უმოწყალოდ სცემდა. ამას საპატრულო პოლიცია შორიდან უყურებდა. მას შემდეგ ჩაერთო საპატრულო პოლიციის ეკიპაჟი, რაც უბრალოდ, მოქალაქეებმა გაიგეს ხმაური და ჩვენს შველას შეეცადნენ. შემდგომ, უკვე მოგვიანებით მე შევძელი განმეხორციელებინა 112-ში ზარი, რის შემდეგაც პოლიციაც მოვიდა შემთხვევის ადგილზე. დაკავებულია რამდენიმე პირი, მაგრამ არა ყველა", — ამბობს ის.

გოგოხიას თქმით, თავდამსხმელების მთავარი სამიქნე იყო კამერა და ისინი ერთმანეთს სწორედ იმაზე მიუთითებდნენ, რომ დაემტვრიათ აპარატურა.

"მათი სამიზნე იყო კამერა, ისინი ერთმანეთს მიუთითებდნენ, რომ აპარატურა დაემტვრიათ და ასევე, გაეტაცებინათ კამერა. სავარაუდოდ, ჩვენი კამერა სამიზნე იმიტომ გახდა, რომ ჩენ დავაფიქსირეთ ალტ ინფოს ოფისზე დახატული უკრაინის დროშა და წარწერები ჰქონდათ უცნობ პირებს გაკეთებული და ამ წარწერას ზუგდიდის მუნიციპალიტეტის აიპი, ანუ მერიას დაქვემდებარებული აიპის თანამშრომლები ასუფთავებდნენ სასწრაფო წესით. მათ ჰქონდათ სპეციალური სითხეები მოტანილი და დაახლოებით 6 თანამშრომელს, რომლებიც ამას სასწრაფოდ ასუფთავედნენ, ისეთ დროს მივუსწარით, კადრები გადავიღეთ", — ამბობს ემა გოგოხია.

ჟურნალისტის თქმით, პოლიციამ რამდენიმე მათგანი დააკავა, თუმცა არა ყველა.

სპეციალური საგამოძიებო სამსახურის ინფორმაციით, საქმეზე გამოძიება სისხლის სამართლის კოდექსის 154-ე მუხლის მეორე ნაწილით დაიწყო.