ახალგაზრდა იურისტთა ასოციაცია საგამოძიებო ორგანოს პრორუსული, ძალადობრივი და ჰომოფობიური ჯგუფის მიერ აქტივისტის მიმართ მუქარის ფაქტების დროული გამოძიებისკენ და პასუხისმგებელი პირების გამოვლენისკენ მოუწოდებს.

გარდა ამისა, საიას თქმით, საგამოძიებო ორგანომ უნდა გააკეთოს მკაფიო განცხადება, რომ ძალადობრივი ჯგუფის ქმედებები დაუსჯელი არ დარჩება.

ორგანიზაცია, რომელიც სამირა ბაირამოვას უფლებებს იცავს, განმარტავს, რომ აქტივისტმა არაძალადობრივი აქტით — ოფისის ფასადზე უკრაინისა და ევროკავშირის დროშების დახატვით მარნეულში ალტ-ინფოს პარტიის ოფისის გახსნა გააპროტესტა.

"რადიკალური ჯგუფის წევრებმა მარნეულში ვიდეო მიმართვა ჩაწერეს, რომელიც თავისი ფორმითა და შინაარსით მუქარას შეიცავს. ვიდეო მიმართვაში ძალადობრივი ჯგუფი პარტიის სიმბოლიკის გადაღებვას, რელიგიური სიმბოლოს — ჯვრის შეურაცხყოფად წარმოაჩენს, რითაც ცდილობს პრორუსული პარტიის მიმართ გამოხატულ პროტესტს ქრისტიანულ რელიგიასთან დაპირისპირების სახე მისცეს. პარტიული დროშა/პლაკატი, რომელიც შესაძლოა ჯვრის ფორმის მოხატულობას შეიცავდეს, მას რელიგიურ სიმბოლოდ არ აქცევს. მსგავსი ინტერპრეტაცია მიუღებელი და საფრთხის შემცველია", — ნათქვამია განცხადებაში.

ახალგაზრდა იურისტთა ასოციაცია ხაზს უსვამს იმ გარემოებასაც, რომ ამ ჯგუფის მიერ 5-6 ივლისს განხორციელებული ჯგუფური ძალადობის ორგანიზება და ასეთი ქმედებებისკენ საჯაროდ მოწოდება ამ დრომდე დაუსჯელია. შესაბამისად, ორგანიზაცია აღნიშნავს, რომ ეს გამოძიების მიმართ ნდობას ამცირებს და მოძალადე ჯგუფებს ახალისებს.

ამასთან, განცხადებაში ნათქვამია ისიც, რომ ბაირამოვას წინააღმდეგ შინაგან საქმეთა სამინისტრომ ალტ-ინფოს ადგილობრივი ოფისის ხელმძღვანელის საჩივრის საფუძველზე ადმინისტრაციული სამართალდარღვევის საქმის წარმოება დაიწყო და მის მიმართ იერსახის დამახინჯების მუხლით ომი შეადგინა. ამაზე, გუშინ, 16 მარტს სამირა ბაირამოვამ On.ge-ს განუცხადა, რომ მას ოქმზე ხელი არ მოუწერია.

ალტ-ინფოს ოფისზე ბანერის შეღებვის შემდეგ სამირა ბაირამოვამ მუქარის შემცველი და შეურაცხმყოფელი შეტყობინებები მიიღო. მან საგამოძიებო უწყებას იმავე დღეს მიმართა. შსს-მ გამოძიება სისხლის სამართლის 151-ე მუხლით დაიწყო, რაც რაც სიცოცხლის მოსპობის ან ჯანმრთელობის დაზიანების მუქარას გულისხმობს.