საქართველოს ეროვნული ბანკის განცხადებით, ევროპის ქვეყნებიდან საქართველოში ტრანზაქციების აკრძალვის შესახებ ინფორმაცია ტყუილია.

სებ წერს, რომ ბანკები კონკრეტული ტრანზაქციის თაობაზე გადაწყვეტილებებს შიდა პოლიტიკის საფუძველზე იღებენ. უწყებას ამის მაგალითად შვედურის ბანკის, Handelsbanken-ის გადაწყვეტილება მოჰყავს, რომლის მიხედვითაც კომპანია საქართველოს მიმართულებით ფინანსურ ტრანზაქციებს აჩერებს.

"რეგიონში გაზრდილი რისკებიდან გამომდინარე, როგორც უცხოური ისე ქართული ბანკები აანალიზებენ, თუ რამდენად მისაღებია მათთვის იმ რესურსის გაღება, რომელიც საჭიროა კონკრეტული ტრანზაქციების სანქციებთან შესაბამისობის დასადგენად. სწორედ ამ შეფასებისა და კომერციული ბანკის შიდა პოლიტიკა-პროცედურების საფუძველზე მიიღება კონკრეტული ტრანზაქციის თაობაზე გადაწყვეტილებები.

ამის მაგალითია ინტერნეტ სივრცეში გავრცელებული ინფორმაცია შვედეთის ერთ-ერთი კომერციული ბანკის მიერ საქართველოს მიმართულებით ფიზიკური პირებისათვის ტრანზაქციების შეწყვეტაზე. აქვე აღვნიშნავთ, რომ შვედეთის რიგი სხვა ბანკები, ისევე როგორც ევროპისა და აშშ-ს საფინანსო ინსტიტუტები გადმორიცხვებს სტანდარტულ რეჟიმში აგრძელებენ", — წერია სებ-ის განცხადებაში.

შვედეთის ერთ-ერთი უმსხვილესი ბანკი, Handelsbanken საქართველოს მიმართულებით ფინანსური ტრანზაქციების შეჩერებას 21 მარტიდან გეგმავს. ბანკში ამბობენ, რომ ამ გადაწყვეტილების მიზეზი სანქცირებულ ქვეყნებში სატრანზიტო გადარიცხვების გაზრდილი რისკია.

"Handelsbanken საქართველოში უცხოური გადახდების შესაძლებლობას ზღუდავს. ცვლილებების მიზეზი უკრაინაში არსებული ვითარებაა. იქიდან გამომდინარე, რომ სანქცირებულ ქვეყნებში ტრანზიტული გადარიცხვების გაზრდილ რისკს ვხედავთ, ჩვენ მივიღეთ ეს გადაწყვეტილება, რათა დავრწმუნდეთ, რომ სანქციების შესრულებასთან თანხვედრაში ვართ", — წერია ბანკის მიერ On.ge-თვის მიწერილ წერილში.

როგორც ბანკში ამბობენ, ეს შეზღუდვა საქართველოსთან ერთად სომხეთსაც შეეხება.