24 თებერვალს რუსეთი უკრაინაში შეიჭრა და ომი წამოიწყო, რომელიც დღემდე გრძელდება. აგრესიის საპასუხოდ უამრავმა კომპანიამ რუსეთის ბაზარი დატოვა. მათ შორისაა McDonald's-იც, რომელიც რუსეთში არსებულ 850-ზე მეტ ფილიალს დროებით ხურავს.

როგორც ჩანს, აღნიშნული შეზღუდვა რუსებისთვის განსაკუთრებულად მძიმე აღმოჩნდა. ამის ერთ-ერთი მაგალითი კი რუსი ლუკა საფრონოვია, რომელმაც პროტესტის ნიშნად თავი McDonald's-ის ერთ-ერთი ფილიალის კარზე მიიბა. ამის ამსახველ ვიდეოს ტვიტერზე გამოცემა Financial Times-ის მოსკოვის განყოფილების ხელმძღვანელი მაქს სედონი ავრცელებს.

"დღეს მოსკოვში მხოლოდ ომს არ აპროტესტებენ. რუსეთის პირველი მაკდონალდსის დახურვამდე რამდენიმე საათით ადრე ლუკა საფრონოვმა კარზე თავი მიიჯაჭვა. ის შემდეგ პოლიციელებმა გაათავისუფლეს", — წერს სედონი.

ვიდეოში კაცს ეკითხებიან, სად აპირებს ჭამას, თუ მაკდონალდსი არ გაიხსნება. ის კი პასუხობს, რომ სხვა ადგილს იპოვის, თუმცა უბედური იქნება.

"მათ დახურვის უფლება არ აქვთ. მათი დახურვა ჩემი და სხვა მოქალაქეების მიმართ ძალადობაა", — ამბობს ლუკა საფრონოვი ვიდეოში.

ლუკა ერთადერთი რუსი არაა, რომელიც მაკდონალდსის დახურვას მისტირის. კომპანიის გადაწყვეტილების გამოცხადების შემდეგ რუსები ფილიალებს მიაწყდნენ, ზოგიერთმა მათგანმა კი პროდუქციის ინტერნეტით გაყიდვაც კი დაიწყო.

ამავე თემაზე:

რუსეთში McDonald's იხურება — რუსები ბურგერებს ინტერნეტში გაასმაგებული ფასებით ყიდიან