24 თებერვალს რუსეთი უკრაინაში შეიჭრა და ომი წამოიწყო, რომელიც დღემდე გრძელდება. ომს უკრაინელი ჯარისკაცების გარდა მშვიდობიანი მოსახლეობის სიცოცხლეც ეწირება — ოკუპანტები უდანაშაულო ადამიანებს შეუბრალებლად ხოცავენ.

უკრაინაში მიმდინარე მძიმე მოვლენებს შორის ერთ-ერთი ყველაზე შემზარავი და მოულოდნელი 9 მარტს ოკუპანტების მიერ მარიუპოლის სამშობიაროს დაბომბვა აღმოჩნდა. ამ ისტორიის ერთ-ერთი მთავარი გმირი კი საკაცეზე მწოლიარე დაჭრილი ორსული ქალი იყო, რომლის ფოტომაც მსოფლიო შემოიარა. გამოცემა Associated Press-ის ინფორმაციით, ქალი გარდაიცავალა. ექიმებმა ვერც მისი ბავშვის გადარჩენა ვერ შეძლეს.

ქალის გარდაცვალების შესახებ ინფორმაცია Facebook-ზე ჟურნალისტმა ასია დოლინამ გაავრცელა:

"მარიუპოლის ბავშვთა მე-3 საავადმყოფოს დაბომბვის დროს გადაღებული ვიდეოდან/ფოტოდან პირველი ორსული ქალი, რომელიც საკაცით გამოიყვანეს, გარდაიცვალა. ვერც მისი ბავშვი გადარჩა. ფოტოგრაფმა ევგენი მალოლეტკამ, რომელმაც AP-ისთვის ეს ფოტოები გადაიღო, ინფორმაცია დაადასტურა", — წერს ჟურნალისტი.

გავრცელებული ინფორმაციის მიხედვით, დაჭრილი ქალი ფრონტის ხაზთან ახლოს, სხვა საავადმყოფოში გადაიყვანეს. ექიმებმა ქალს საკეისრო კვეთა ჩაუტარეს, თუმცა, ქირურგის თქმით, ბავშვი გარდაცვლილი იყო.

ქირურგი ტიმურ მარინის თქმით, მშობიარობის შემდეგ ქალის გადარჩენას ექიმები ნახევარი საათის განმავლობაში უშედეგოდ ცდილობდნენ. ექიმების თქმით, მათ იმის დროც კი არ ჰქონდათ, რომ ქალის სახელი ეკითხათ — მისი ვინაობა მხოლოდ მაშინ გაიგეს, როცა გარდაცვლილს საავადმყოფოში ქმარმა და მამამ მოაკითხეს.

აღსანიშნავია, რომ მარიუპოლის დაბომბვის ამსახველი ფოტოების კიდევ ერთი მთავარი გმირი ორსული მარიანა იყო, რომელსაც ცოტა ხნის წინ გოგო შეეძინა.

ფოტო: Evgeniy Maloletka / AP

ამავე თემაზე: