რუსული ტელეკომპანია დოჟდიმ დროებით სატელევიზიო მუშაობა შეწყვიტა და მაყურებელს ბალეტ გედების ტბით დაემშვიდობა. "არა ომს" — თქვა არხის გენერალურმა დირექტორმა, ნატალია სინდეევამ, რის შემდეგაც ჟურნალისტებმა სტუდია დატოვეს.

გედების ტბას უშვებდნენ ტელევიზიებსა და რადიოში საბჭოთა პერიოდში, 1980-იან წლებში ლიდერების გარდაცვალებისას. ეს ბალეტი გაუშვეს 1991 წლის აგვისტოშიც საბჭოთა კავშირის დაშლამდე რამდენიმე თვით ადრე.

რუსეთის სატელეკომუნიკაციო მარეგულირებელმა უკვე დაბლოკა დოჟდის ვებგვერდი იმ მიზეზის გამო, რომ გაბედეს და ომს ომი უწოდეს და არა "ოპერაცია", როგორც ამას პუტინის პროპაგანდა ითხოვს.

ტელეკომპანია რუსეთში 2010 წლიდან მუშაობს. პუტინის ხელისუფლებისადმი კრიტიკული ტონის გამო, რუსეთმა ის "უცხო ქვეყნის აგენტად" გამოაცხადა. ახლა კი პროკურატურამ ვებგვერდი დაუბლოკა იმის გამო, რომ ომს ომი უწოდა და არა სამხედრო ოპერაცია, როგორც ამას პუტინის პროპაგანდა ფუთავს.

კიდევ ერთი კრიტიკული მედიის, მედუზას ვებგვერდი რუსეთში მომხმარებელთა ნაწილისთვის მიუწვდომელია. ინფორმაცია ამის შესახებ ტელეგრამ არხებზე გავრცელდა და გამოცემამაც დაადასტურა. ასევე ვრცელდება ინფორმაცია, რომ რუსეთში წვდომა შეიზღუდა BBC-ის, Deutsche Welle-ს ვებგვერდებზე, ხოლო რადიო თავისუფლებას ქვეყნის რამდენიმე რეგიონში ვერ ხსნიან.