უკრაინაში ონლაინ პლატფორმა, Tell Me იმოქმედებს — ის მოქალაქეებს, რომლებსაც ომის დროს, რუსული აგრესიის შედეგად ფსიქოლოგიური ზიანი მიადგათ, კონსულტაციებს გაუწევს. ამის შესახებ ინფორმაციას უკრაინის პრეზიდენტის ადმინისტრაცია ავრცელებს, სადაც აღნიშნულია, რომ პროექტი პრეზიდენტის აპარატის, ჯანდაცვის სამინისტროსა და კოგნიტური მოდელირების ინსტიტუტის მხარდაჭერით ხორციელდება.

"თუ გრძნობთ შფოთვას, პანიკურ შეტევებს, გაქვთ დეპრესიის ნიშნები, დატოვეთ მოთხოვნა Tell Me-ის პლატფორმაზე და დაელოდეთ გამოხმაურებას სპეციალისტისგან. დახმარების მისაღებად საჭიროა მოკლედ აღწეროთ თქვენი მოთხოვნა და გაგზავნოთ ვებსაიტის საშუალებით", — აღნიშნულია განცხადებაში.

მათი ცნობით, პლატფორმის მოდერატორები შეარჩევენ სპეციალისტს და ის მოქალაქეებს მოკლე დროში დაუკავშირდებიან — კონსულტაციები უფასოა და ის 24 საათის განმავლობაშია ხელმისაწვდომი.

"გარდა ამისა, კოგნიტური მოდელირების ინსტიტუტის გუნდმა, ბოგომოლეტის ეროვნული სამედიცინო უნივერსიტეტის სამედიცინო ფსიქოლოგიის, ფსიქოსომატური მედიცინისა და ფსიქოთერაპიის დეპარტამენტთან და Friend პროექტის სპეციალისტებთან თანამშრომლობით, შეიმუშავა პირველი ფსიქოლოგიური დახმარების ბოტი. ის გამოგადგებათ ტრავმული მოვლენის შემდეგ პირველ საათებში. ბოტი მენტალური ჯანმრთელობისთვის რეკომენდაციებსაც შეიცავს", — აცხადებენ პრეზიდენტის აპარატში.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში