უკრაინასა და რუსეთს შორის მოლაპარაკებების პირველი შეხვედრა დასრულდა — მხარეებმა მეორე რაუნდის შესაძლებლობა განიხილეს. ამის შესახებ უკრაინის პრეზიდენტის აპარატის უფროსმა მრჩეველმა, მიხაილ პოდოლიაკიმ ისაუბრა. მის კომენტარს გამოცემა Unian ავრცელებს.

"მხარეებმა გამოავლინეს არაერთი პრიორიტეტული საკითხი, რომლებზეც გარკვეული გადაწყვეტილებები გამოიკვეთა", — თქვა მან.

შეხვედრა თითქმის 6 საათს გაგრძელდა. ამ დროისთვის მხარეები დედაქალაქებში ბრუნდებიან, რათა მოლაპარაკებების შედეგები განიხილონ.

უკრაინის დელეგაცია წინასწარი პირობების გარეშე რუსებს უკრაინა-ბელარუსის საზღვარზე შეხვდა. ზელენსკიმ 27 თებერვალს განაცხადა, ბელარუსის პრეზიდენტთან, ალექსანდრე ლუკაშენკოსთან სატელეფონო საუბრისას შეთანხმდნენ, რომ რუსული და უკრაინული დელეგაციები ერთმანეთს მოსალაპარაკებლად მდინარე პრიპიატის მიდამოებში შეხვდებოდნენ.

უკრაინის დელეგაციაში იყვნენ თავდაცვის მინისტრი, ოლექსი რეზნიკოვი, უკრაინის პრეზიდენტის აპარატის უფროსის მრჩეველი, მიხაილო პოდოლიაკი და უკრაინის საგარეო საქმეთა მინისტრის მოადგილე, მიკოლა ტოჩიცკი. დელეგაციის შემადგენლობაში არ ყოფილა უკრაინის პრეზიდენტი, ვოლოდიმირ ზელენსკი.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში