FIFA რუსეთს უკრაინაში შეჭრის გამო შეზღუდვებს უწესებს. ორგანიზაციის თქმით, FIFA-მ ოლიმპიური კომიტეტის (IOC) რეკომენდაციების შესაბამისად მიეღო შემდეგი ზომები რუსეთის წინააღმდეგ:

  • რუსეთის ტერიტორიაზე მატჩები არ ჩატარდება, მან ნეიტრალურ ტერიტორიაზე უნდა ითამაშოს, მაყურებლის გარეშე;
  • გუნდი ქვეყნის სახელით მონაწილეობას ვერ მიიღებს, უნდა ითამაშოს "რუსეთის საფეხბურთო კავშირი" სახელით;
  • არ აქვთ უფლება გამოიყენონ რუსული სიმბოლიკა — დროშა, ჰიმნი.

"პირველ რიგში, FIFA-ს სურს კიდევ ერთხელ დაგმო რუსეთის მიერ ძალის გამოყენება უკრაინის წინააღმდეგ. ძალადობა არასოდეს არის გამოსავალი და FIFA გამოხატავს თავის ღრმა სოლიდარობას ყველა იმ ადამიანის მიმართ, ვინც დაზარალდა უკრაინაში მომხდარის გამო", — ვკითხულობთ FIFA-ს განცხადებაში.

მიუხედავად იმისა, რომ სანქციების თავდაპირველი სია სრულად არ კრძალავს რუსეთს, FIFA-ს განცხადებაში ნათქვამია, რომ "გააგრძელებს მიმდინარე დიალოგს IOC, UEFA და სხვა სპორტულ ორგანიზაციებთან, რათა დადგინდეს ნებისმიერი დამატებითი ზომა ან სანქცია, მათ შორის შეჯიბრებიდან პოტენციური გამორიცხვა".

ორგანიზაცია აღნიშნავს, რომ ისინი კონტაქტში არიან პოლონეთის ფეხბურთის ასოციაციასთან, ჩეხეთის რესპუბლიკის ფეხბურთის ასოციაციასთან და შვედეთის ფეხბურთის ასოციაციასთან, რათა იპოვონ შესაბამისი და მისაღები გადაწყვეტილებები 2022 წლის მსოფლიო ჩემპიონატის საკვალიფიკაციო მატჩებთან დაკავშირებით.

24 თებერვალს პუტინმა უკრაინაში ომი დაიწყო. კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია — იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან.

ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი. რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგარქებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს. აშშ-მ დაასანქცირა ვლადიმერ პუტინი და სერგეი ლავროვიც.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში