NATO ალიანსის აღმოსავლეთ ნაწილში დამატებით ძალებს განალაგებს. ამის შესახებ ახალ განცხადებაშია საუბარი, სადაც NATO რუსეთის ომს გმობს და უკრაინას მხარდაჭერას კიდევ ერთხელ უცხადებს. ამასთან, NATO-ს ცნობით, გააქტიურდა მათი საპასუხო ძალები.

"სამყარო როგორც რუსეთს, ასევე, ბელარუსს პასუხს აგებინებს მათი ქმედებებისთვის. მოვუწოდებთ ყველა სახელმწიფოს უპირობოდ დაგმოს ეს უგუნური თავდასხმა. რუსეთის ხელისუფლების ტყუილებმა არავინ უნდა გაასულელოს.

ამ კონფლიქტზე სრული პასუხისმგებლობა რუსეთს ეკისრება. რუსეთმა უარყო დიპლომატიის გზა და დიალოგი, რომელსაც NATO და მოკავშირეები განუწყვეტლივ სთავაზობდნენ. არსებითად დაარღვია საერთაშორისო სამართალი, მათ შორის, გაეროს დებულება", — ვკითხულობთ განცხადებაში.

ალიანსის თქმით, პუტინის მიერ უკრაინაზე თავდასხმის გადაწყვეტილება საშინელი სტრატეგიული შეცდომაა, რომლისთვისაც რუსეთი მძიმე საფასურს გადაიხდის — როგორც პოლიტიკურს, ასევე, პრაქტიკულს.

მას შემდეგ, რაც უკრაინის ოკუპირებული ტერიტორიები დამოუკიდებელ რესპუბლიკებად გამოაცხადა, პუტინმა თქვა, რომ "მათ დასაცავად" ჯარებს შეიყვანდა და მალევე უკრაინაში ომი დაიწყო. თავად პუტინი და მისი პროპაგანდისტები ამ ომს სპეციალურ "სამხედრო ოპერაციას" უწოდებენ.

კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია— იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან. ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი.

რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტრნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგაქრებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში