აშშ-ის პრეზიდენტის, ჯო ბაიდენის განცხადებით, სანქციები, რომლებსაც აშშ უწესებს რუსეთს, შესაძლოა, უფრო მეტად შედეგიანი იყოს, ვიდრე ქვეყნის SWIFT-დან გარიცხვა. როგორც მან აღნიშნა, SWIFT-დან ვინმეს გარიცხვა "ყოველთვის შესაძლებელია", მაგრამ "ამჟამად, ეს არ არის ის პოზიცია, რომლის დაკავებაც დანარჩენ ევროპას სურს".

უკრაინის საგარეო საქმეთა მინისტრი დმიტრო კულება რუსეთის SWIFT-ის გადახდის სისტემიდან გათიშვას ითხოვს. მინისტრმა განაცხადა, რომ ეს მოთხოვნა მკაცრია და არ ექვემდებარება დიპლომატიის წესებს.

"მე არ ვიქნები დიპლომატიური ამ საკითხთან დაკავშირებით. ყველას, ვინც ახლა ეჭვობს, უნდა გამოეთიშოს თუ არა რუსეთი SWIFT-ს, უნდა ესმოდეს, რომ უდანაშაულო უკრაინელი კაცების, ქალებისა და ბავშვების სისხლი მათ ხელებზეა", — თქვა კულებამ და დააყოლა: "გათიშეთ რუსეთი SWIFT-ისგან!"

მედიებში გავრცელებული ინფორმაციით, არსებობს რეალური შესაძლებლობა, რომ ევროკავშირმა რუსეთი ჩამოაშოროს SWIFT-ს, უსაფრთხო გადახდის ქსელს, რომელიც აკავშირებს ათასობით ფინანსურ ინსტიტუტს მთელ მსოფლიოში. CNN-ის განმარტებით, რუსეთის SWIFT-დან გაყვანა თითქმის შეუძლებელს გახდის ფინანსური ინსტიტუტებისთვის ფულის გაგზავნას ქვეყანაში ან მის გარეთ. ეს სერიოზულად იმოქმედებს რუსულ ბიზნესზე უცხოელ კლიენტებთან და, შესაძლოა, რეალური ზიანი მიაყენოს ქვეყნის ეკონომიკას.

თუმცა, გამოცემის ინფორმაციით, ევროკავშირის ქვეყნების ნაწილს ამ ნაბიჯის გადადგმა არ სურს — განსაკუთრებით მათ, ვისაც მჭიდრო ეკონომიკური კავშირები აქვთ რუსეთთან. გამოცემამ დაასახელა 4 ასეთი სახელმწიფო — გერმანია, იტალია, უნგრეთი და კვიპროსი, მაგრამ არ მიუთითა, სრული იყო თუ არა ეს სია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: