რუსეთსა და უკრაინას შორის გამწვავებული სიტუაციის ფონზე, პატრიოტთა ალიანსმა ქართულმა მარშმა და სხვა პრორუსულმა ჯგუფებმა ოკუპანტი ქვეყნის პრეზიდენტს, ვლადიმერ პუტინს ღია წერილი მისწერეს. წერილს პატრიოტთა ალიანსის ლიდერი, ირმა ინაშვილი ფეისბუქგვერდზე ავრცელებს.

წერილი პუტინის მიმართ "მადლიერების" გამოხატვით იწყება. "თქვენო აღმატებულებავ" — ასე მიმართავენ ისინი რუსეთის პრეზიდენტს და საქართველოს ინტერესების დაცვის მოტივით, რუსული ნარატივის შემცველ მოსაზრებებს აჟღერებენ. მათი მტკიცებით, ისეთი ქვეყნებისთვის, როგორიც საქართველო და უკრაინაა სამხედრო ნეიტრალიტეტია აუცილებელი.

"გვინდა მოგაწოდოთ ინფორმაცია, რომ ჩვენ საერთაშორისო უსაფრთხოების ახალი სისტემის მშენებლობის მომხრეები ვართ, რომელიც დაფუძნებული იქნება სამართლიანობაზე და მხარეების ინტერესების ორმხრივ პატივისცემაზე — ასევე, მთავარი მიდგომა ისეთი ქვეყნებისთვის, როგორიცაა საქართველო და უკრაინა, ჩვენი აზრით, სამხედრო ნეიტრალიტეტი უნდა იყოს", — ამბობენ ისინი.

წერილის ავტორები ირწმუნებიან, რომ რუსეთთან დაპირისპირება საქართველოსთვის დამღუპველია და მის გარეშე ქვეყანა გამოწვევებს ვერ გაუმკლავდება. მათი განცხადებით, "რუსეთთან მჭიდრო თანამშრომლობისკენ ისწრაფვიან" და ამბობენ, რომ დუმისა და ფედერაციის საბჭოს ხელმძღვანელთან შეხვედრას ისურვებდნენ.

"ვიაზრებთ რა, რომ რუსეთთან თანამშრომლობის გარეშე საქართველო ვერ გაუმკლავდება ვერც რეგიონალურ და მით უმეტეს, ვერც გლობალურ გამოწვევებს, ჩვენ ვისწრაფვით რუსეთთან მჭიდრო თანამშრომლობისკენ და ვისურვებდით შეხვედრას სახელმწიფო დუმისა და ფედერაციის საბჭოს ხელმძღვანელობასთან, რომ შევიტანოთ თუნდაც პატარა წვლილი რეგიონალური უსაფრთხოების ეფექტიანი სისტემის ფორმირებაში", — ნათქვამია წერილში.

ანტიდასავლური განცხადებებით ადრეც გამორჩეული ორგანიზაციები ახლაც არ ერიდებიან ასეთი შინაარსის მოსაზრებებს. მათი მტკიცებით, საქართველო თავისუფალი არ არის, არგუმენტად კი მოჰყავთ ის, რომ ქვეყნის ტერიტორიაზე ხელისუფლება NATO წვრთნების ჩატარების "საშუალებას" აძლევს.

"მწუხარებით უნდა აღვნიშნოთ, რომ საქართველო არ არის თავისუფალი ქვეყანა, რასაც ადასტურებს უმაღლესი თანამდებობის პირების განცხადებები იმაზე, რომ "აშშ-ის პოზიცია საქართველოს ხელისუფლებისთვის საშინაო დავალებაა". ფაქტია, რომ საქართველოს მთავრობა, ქვეყნის ინტერესების საწინააღმდეგოდ, რეგულარულად აძლევს NATO-ს საკუთარ ტერიტორიაზე წვრთნების ჩატარების საშუალებას, რაც სხვა არაფერია, თუ არა რუსეთის პირდაპირი გამოწვევა", — ვკითხულობთ წერილში.

ისინი ღიად ესხმიან არასამთავრობო ორგანიზაციებს. მათი მტკიცებით, უცხოური ორგანიზაციები "ყალბ სოციოლოგიურ კვლევებს ატარებენ" და ისეთ სურათს "ხატავენ", თითქოს ჩრდილოატლანტიკურ ალიანსში გაწევრიანება საყოველთაოა. ამ აზრის გაბათილებას ისინი პრორუსული პარტიის, პატრიოტთა ალიანსის ჩატარებული პროპაგანდისტული "კვლევით" ცდილობენ, რომლის მიხედვითაც, 69,4% მხარს უჭერს სამხედრო ნეიტრალიტეტს, 75,8% კი რუსეთთან დიალოგის მომხრეა. ხსენებული "კვლევა" არაერთ დარღვევას შეიცავს.

წერილი, რომელიც რუსული პროპაგანდისთვის დამახასიათებელი მესიჯბოქსებითაა გაჯერებული, კვლავ ოკუპანტი ქვეყნის პრეზიდენტისთვის პატივისცემის დადასტურებით სრულდება.

"ბატონო პრეზიდენტო, მოგმართავთ ჩართულობის იმედით და კიდევ ერთხელ გთხოვთ, მიიღოთ ჩვენი უდიდესი პატივისცემა თქვენდამი", — წერენ ისინი.

ეს პირველი შემთხვევა არ არის, როდესაც პატრიოტთა ალიანსი და ქართული მარში უგულებელყოფს რუსულ აგრესიას და ღიად აფიქსირებს თავის პროპუტინისტურ პოლიტიკას. 2012 წელს შექმნილი პატრიოტთა ალიანსი ერთადერთი პარტიაა საქართველოში, რომლის ლიდერებიც აგვისტოს ომის შემდეგ იყვნენ, როგორც ოკუპანტ ქვეყანაში, ასევე, ოკუპირებულ რეგიონში. პარტიაში ამტკიცებენ, რომ ეს "ჰუმანიტარული მისიითა" და მოლაპარაკების სურვილით იყო განპირობებული.

მიუხედავად მათი მტკიცებისა, სხვადასხვა ავტორიტარული გამოცემა კრემლიდან დაფინანსებასა და რუსულ სპეცსამსახურებთან ურთიერთობაში მათ ხშირად ადანაშაულებს.