კრემლის პრესპიკერის, დმიტრი პესკოვის განცხადებით, ამერიკის შეერთებული შტატების ელჩის მოადგილის ქვეყნიდან გაძევება პროვოკაციაზე პასუხი იყო.

"ამერიკელი დიპლომატის გაძევება საპასუხო მოქმედება იყო და ასევე, ეს არ შეიძლება იყოს ისეთი ქმედება, რომელიც რაიმეს პროვოცირებას ახდენს, ეს პასუხია პროვოკაციაზე", — განაცხადა პესკოვმა.

მანამდე რუსეთის საგარეო უწყების პრესსპიკერმა, მარია ზახაროვამ განაცხადა, რომ აშშ-ის ელჩის მოადგილის გაძევება საპასუხო ქმედება იყო ვაშინგტონში რუსეთის საელჩოს თანამშრომლის "გაუმართლებელ" გაძევებაზე. მისი მტკიცებით, სახელმწიფო დეპარტამენტმა სპეციალურად უგულვებელყო მოსკოვის თხოვნა, გაეგრძელებინათ ამ დიპლომატის ყოფნის უფლება იქამდე, სანამ მისი შემცვლელი ჩავიდოდა.

17 თებერვალს ცნობილი გახდა, რომ რუსეთმა ამერიკის შეერთებული შტატების ელჩის მოადგილე, ბარტ გორმანი ქვეყნიდან გააძევა.

ბაიდენის ადმინისტრაცია ამ გადაწყვეტილებას ესკალაციისკენ მიმართულ ნაბიჯად შეაფასა.